Kategorien
Energie enmarcheopdeknuedler grengwierkt Mobilitéit Partizipatioun stadlëtzebuerg zukunft

Klimaziler fir d’Stad Lëtzebuerg

De 5. November hunn d’Linda Gaasch, de François Benoy an ech fir déi gréng Stad Lëtzebuerg konkret Proposen virgestallt fir eng klimaneutral Stad Lëtzebuerg. Hei meng Présentatioun:

Wa mir vun enger klimaneutraler Stad schwetzen, dann inkludéiert dat eng ganz Parti Elementer: de François Benoy huet elo vun engem aneren Urbanismus geschwat an och enger anerer Mobilitéit. Des aner Mobilitéit huet e.A. mat der Reduktioun vun onsem Appetit un Energie ze dinn. D’Linda Gaasch schwetzt duerno iwwer den intelligenten Verbrauch vu Ressourcen, also och der Reduktioun vum Appetit un Energie an och wéi mir zesummen bei eng klimaneutral Stad kommen.

Esou eng klimaneutral Stad huet och oder villeicht ganz vill, mat dem Gebrauch vun aneren Energien wéi déi vun bis elo, ze dinn. Et geet jo em net méi oder manner, wéi déi gesamt al Energien, duerch erneierbar Energien ze ersetzen.

Dat heescht: et muss ee genug „produzéieren“. Also Energie aus erneierbaren Quellen opbereeden, fir dass se fir ons notzbar ass.

Ech erënneren un Leitsaz dee mer aus de Chimie a Physik kennen: « rien ne se crée, rien ne se perd, tout se transforme » (Bsp : fir 7. Liter Bensin op ze bereeden fir 100 km furen ze kënnen, sinn 11 KWH Stroum néideg, genug fir 65-85 km mat E-Auto ze furen). Et geet also em Transformatioun, mat der Nuance, dass déi final Transformatioun, déi mir Verbrauch nennen, bei den erneierbaren Energien, keng Zäregasen, keen CO2, produzéiert. De Challenge ass, dës Transformatioun esou geschmeideg wéi méiglech, dat heescht mat esou mann wéi méiglech Verloschter, hin ze kréien. Beim Solarstroum sinn des Verloschter relativ kleng.

Deemno fir d’Productioun sprech Transformatiouin, a grousse Quantitéiten, do eegent sech d’Photovoltaik am beschten. D’PV buet zudeem eng grouss Akzeptanz, well si ass moduléierbar en Fonctioun vum Besoin an relativ easy to treat. Anescht zwar wéi déi gewinnten Manéier, mee awer net komplizéiert. Si ass upassbar.

Och hei an der Stad mat hiren 20.000 Gebeier. Dovun, sinn der Ronn 800 d’Propriétéit vun der Gemeng. Dat ass eng grouss Zuel. Par contre a leider ass d’Zuel vun PV Anlagen op dëse Gebeier vun der VdL nawell kleng. Grad emol 2 % vum Potential gëtt profitéiert. Zirka 220 KWp Anlagen goufen bis elo installéiert.

Mir hunn ausgrechent dass awer ronn 10.000 KWp méiglech wiren.

Am Prinzip 800 – 1000 KWH pro KWp -> elektresche Stroum 9.000.000 KWStonnen (9.000 MWh) also fir ronn 2500 Haushalter oder 9.000 – 10.000 Leit. Oder genug fir de Fonctionnement vun alle Kläranlagen an der Stad oder dee vun de Pompelstatiounen, Sprangburen, Réservoiren, plus Eclairage public a soss Beliichtungen vun 2019 zum Beispill.

Et kënnt op all KiloWattStonn un. Et ass eng Aufgab vun ons all: vum big player, der Industrie bis deen eenzelnen. Wa méiglech mat enger Gemeng als Virbild, Virreider.

Well et op jiddereen, op all Daach ukënnt, hu mir och gerechent wat soss d’Potential ass vun all den Diecher an der Stad. Kleng gerechent, mam Solarkadatser op geoportail, komme mir do op 7.500 Heiser vun den 20.000 Heiser déi sech eegenen géngen. Dat ass net iwwerdriwwen..

D‘Ausriichtung vun den Heiser ass ee Facteur awer manner wéi un den Ufäng vun der PV, deemols als virun allem de Süden uviséiert ginn. Entretemps ass d’Technik, notamment d’Sensibilitéit vun PV Panneau esou gutt, dass een och mat Ost-West ausgeriichtenen Anlagen gutt Stroum ka produzéiert ginn. An der Moyenne kann een do 8 KWPeak Anlagen opriichten.

D’Rechnung ass einfach: 7500 x 8 : Also genug fir -> 60.000 KWp, deemno 60.000.000.000 KWh also fir bal 60.000 Persounen. Deemno kënne  ir an der Stad also eleng mat PV d’Halschend vum Elektresch Verbrauch vun de Bierger couvréieren.

Dofir fannen mir, dass bei déi staatlech Ënnerstëtzung fir eng PV Anlag, d’VdL och nach nach zousätzlech ee Ureiz schafe soll notamment bei den Installatiounskäschten.

Dat selwecht, also nach een zousätzlechen Ureiz, stelle mir ons och fir d’Installatioun vun emissiounsfräien Heizsystemer vir. Stéchwuert. Wärmepompel.

An da si mir beim zweeten Aspekt fir eng klimaneutral Stad: d’Systemer, déi bis elo mat den alen, net méi zäitgenässen Energien fonctionnéieren, op der nei, klimafrëndlech ëmstellen. D’Heizung ass esou ee System. An dat ass en domaine mat engem richtegen, gewaltege Impakt, well d’énergie thermique dat sinn 75 % vum CO2 an der Stad – wann een den Stroum net mat aberechent. Mam Stroum ass den Undeel  um CO2 vun der énergie thermique 56 %. De Stroum ass nach net décarboniséiert, mee huet awer een héicht Potential fir Décabornisatioun. Bei de fossilen Energieträger, déi fir ze hëtze benotzt ginn, geschidd dat mat 1/3 mat Mazout, 2/3 si Gas. Dat ass ee gutt Beispill fir eng noutwendeg, zäitno Ëmstellung, fort vun de fossilen.

Et fàllt engem och op, dass wieder de Gazrésau ausgebaut gëtt. Et gi wieder derer Leitungen geluecht Dat ass zwar wéi et ëmmer gemaach ginn ass, wéi fréier, mee net zukunftsorientéiert. Besser wier ee Wärmerésau, alimentéiert a gehëtzt aus marginal, der Iwwerproduktioun vu Solarstroum (während peak Stonnen). Op déi Manéier mécht een och eppes fir „flatten the curve“. Mir hu geléiert, dass dat wichteg ass. Méi ee grousst Potential dofir hunn awer Biogas an Holzpellets. Eng aner Alternativ ass fir vum Gazréseau fort ze kommen, wéi ech virdru schon ernimmt hat, Primme fir Wärmepompelen.

Et geet wéi gesot, dorëms de Fonctionnement vun de verschiddensten Systemer op klimafrëndlech ëmzestellen. Dat gëllt och fir de Fuhrpark vun der Stad Lëtzebuerg. 2 Prozent sinn elektresch. Och do ass ee groust Potential. Et soll ee sech näischt virmaachen: och des Ëmstellung muss kommen. Mee et kann een awer nach wieder Zäit verléieren. An de nexten Joeren stellt sech och d’Camionsproduktioun weltwäit ëm, vu Verbrennermotoren op elektresch. Am Bussecteur kenne mir dat jo schon. Technik ass do, d’Suen sinn et och. Et feelt vläicht den Interessi et ze maachen beim Fuhrpark.

Bon, elo kann ee jo der Meenung sinn, dass een als Gemeng net selwer soll PV Anlagen installéieren. Da fanne mir et soll een déi disponible Flächen, mir hun d’Rechnung virdru gemaach, deene Leit zur Verfügung stellen, déi keen eegene Daach hunn, zum Beispill als Locataire oder an engem Appartementshaus oder an enger Copropriétéit, fir awer aktiv un der Energietransitioun mat ze schaffen, een Deel dovun ze sinn. Ech schwetzen vun de Biergerkooperativen. De participative Volet. D‘Linda Gaasch schwetz herno iwwer déi Idee. D’Leit inkludéieren, mat abannen.

Ee vun der Energietransitioun, och hei an der Stad, ech hat e virdunn ernimmt, ass jo den Appetit un Energie erof ze setzen. Dozou gehéiert eng Auswertung iwwer d’Energiewerter vu Gebeier. Den Energiepass. Den Energiepass bei de Gebeier vun der VdL ass eng laang Geschicht Déi éischt goufen 2010 ausgestallt, zënter 2018 stagnéiert et a just d’Halschend vun de ronn 800 Gebeier hunn een. Déi éischt, déi ausgestallt goufen, riskéieren of ze lafen. Och eng Fro un de Schäfferot vum Carlo Back am Dezember 2019 huet keng concluant Äntwert bruecht. Net verstoen kann ech, firwat, dass net un deenen Gebeier wou d’Werter bekannt sinn, geschafft gëtt i.e. ne tun der sobriété énergétique vun deene Gebeier verbessert gëtt.

Dat gesot: fir ons ass et wichteg fir eng klimaneutral Stad ze ginn:

– Photovoltaik ze fördern, also d’Produktioun vun erneierbaren Energien.

– Gescheck ze maachen bei der Ännerungen vun de Systemer hin zu den erneierbaren Energien.

– manner Energie verbrauchen also d‘Ressourcen schounen, manner verbrauchen.

Merci.

Hei alles

D’Reportage op RTL hei

Den Artikel am Tageblatt hei

Kategorien
Energie Eurosolar Mobilitéit Partizipatioun zukunft

Drénglech Sobriétéit op engem disruptiven,solaren Räiskär Kürbis.

Hei meng Introductiounsried bei der Zeremonie vum Solarpräis de 26.10.2021.

Léif Alleguerten

Am Numm vun Eurosolar Lëtzebuerg begréissen ech Iech all ganz härzlech an ären respektiven respektabelen Fonktiounen hei bei der 11. Zeremonie vum Solarpräis.

Dë Solarpräis gëtt zënter 2003 an diversen Intervallen iwwerreecht. Am Ufank war et all Joër. Tëschend deem läschten, 2019 an deem zweetläschten 2012, waren et 7 Joër. Mir hunn ons virgeholl fir ën all zwee Joer auszeschreiwen.

Iwwerhat ee Solarpräis weider proposéieren. Ass dat nach ubruecht, elo wou déi erneierbar Energien an der Moud sinn?

Jo, well d’Potential vun der Photovoltaik ass nach laang net ausgereizt. Ausserdeem ass Solarstroum dee bëllegsten Stroum, wéi d’Zuelen vun der I.E.A. beleeën.

Et ass drénglech

Elo net all Joër ee Solarpräis, dat huet mat der méi klenger masse critique hei ze dinn. Zwee Joer sinn awer ubruecht, well elo muss Gescheck gemaach ginn. Dat wees ee spéitestens zënter den 3949 Säiten IPCC Report vum August dëst Joër. Woubei, wéi de Robert Habeck sech ausgedreckt huet: et ass kee Kenntnisproblem, mee een Handlungsproblem.

Mir vun Eurosolar schaffe scho laang dofir, dass endlech an iwwerhat a méi séier gehandelt gëtt. Als Erënnerung, Eurosolar Lëtzebuerg ass entstanen aus der Initiative eraus vun enger qualifizéierter Band early adopters déi Ufank den 90er schon: éischtens, gesinn hu kommen, dass d’Klima ee Problem kritt an zweetens, dass d’Photovoltaik net nëmmen eng grouss Hëllef, mee am Fong een essentiellen Deel vun der Léisung ass.

Mir mussen elo handelen.: um Niveau vun der Produktioun, der Distributioun, dem Stockage. Ausserdeem mussen d’Systemer, déi bis elo mat den alen Energien fonctionnéiert hunn, ëmgestallt ginn, fir mat den erneierbaren Energien ze fonctionnéieren.

Sobriétéit

Verlaangt, absolut noutwendeg ass awer och onsen Appetit un Energie ze reduzéieren, Stéchwuert sobriété énergétique. Dat ginn, sinn Diskussiounen. Leider kann een aus de Reiwungen an deenen Diskussiounen keng Energie gewannen. Dobäi kënnt et op all erneierbar Energie un, well et geet jo dorëmms déi al, désuet Energien komplett duerch erneierbar z’ersetzen. Esou séier wéi méiglech.

Mir vun Eurosolar sinn zënter dem läschte Jorhonnert ongedëlleg gedëlleg. Herno schwetzen ons Vizepresidentin Prof. Dr. Susanne Siebentritt, de Prof. Dr. Phillip Dale an den Dr Max Hilaire Wolter, deen och bei Eurosolar am Comité ass, iwwer ons gedëlleg Ongedold. Mir hëllefe gär.

Natiirlech si mir vun Eurosolar awer och frou, dass an de läschte Joeren a Méint vun den zoustännegen Ministeren eng ganz Part Saachen an d’Weeër geleet gi sinn, fir dem handlungsdefizit op ze hëllefen.

Technesch Disruptioun

Dass do nët op den Dibbelchen festgeluecht ka ginn, léisst sech duerchaus rationnell explizéieren, schlisslech ass all technesch Entweckelung net linear, mee stoussweis kontinuéierlech voire disruptiv. Dat gëllt och fir gréng Technologien, een Domaine an deem Lëtzebuerg sech positionnéieren sollt. Ausserdeem ass d’Energietransitioun eppes bei deem vill Elementer zesumme fonctionnéieren mussen, vill Riedercher anënee gräife mussen. En cours de route mierkt een dann, wou ee Riedchen feelt, wou ajustéiert muss ginn.

Breedgefächert Kandidaturen

Dass sech duerchaus Saachen dinn, dass gehandelt gëtt, dat gesäit een bei onsem, effektiv net représentativen Echantillon vun de Kandidaturen fir de Solarpräis dëst Joer. Et gëtt geliwwert : suwuel wat d’Material ugeet fir iwwerhat kënnen ze produzéieren, wéi och wat d’Produktioun selwer ubelaangt, als och d’Flächen déi beluecht ginn fir PV Stroum ze produzéieren.

Och un eng sënnvoll Planung vum Verbrauch, vu der gestioun vum Réseau zum Beispill an der Mobilitéit, een Domaine deen ee gewichtege Facteur an onser Gesamtenergiebilanz ass.

Et kënnt och méi a méi zum ganzheetleche Plangen. Vun Ufank un déi Erneierbar matdenken. Ech ërënneren un ons Publicatioun archipv.lu, déi weisst, wéi een Archtiktur, Ingenieurskonscht a Photovoltaik vum éischte Fiederstrëch un matplangen soll a kann.

Bei de Kandidature ass dann och den participative Volet dobäi an der Hiirstellung awer och an der Verdeelung: een aktiven Deel vu der Energietransitioun sinn. An dann och, didaktesch, firwat déi ganz Energietransitioun richteg, wichteg, néideg an dringlech ass.

Dat ass souzesoen d’Zougänglechkeet vun den 3.949. Säiten vum IPCC Report. Dir hutt se och all gelies, ech brauch do elo net méi drop an ze goen. Esou Informatiounen mussen zougänglech sinn, well wann ee versteet wat ee maachen soll, fällt et engem méi liicht et ze maachen. Dowéinst, eng Klammer, gëtt et jo och den Eurosolar Podcast “d’Sonn am Stecker”. Eng vun onse Missiounen ass och Multiplicateur sinn, erklären, verbreeden, informéieren.

Ee Critère vum Jury ass den innovative Charakter. Wat ass richteg eppes Neies? Wat ass et en différé? Am Sënn vu wat ass op aner Plazen Standard, iwwerdeems et hei esou lues entdeckt gët. A nach gezeckt gëtt beim Implémentéieren. Esou kënnt ee net virun.

Ee Räiskär, vill Räiskären

Als Prétexte gëtt gesot: mir si jo just ee Räiskär.

E puer Remarken: e puer Räiskären, vill Räiskären ginn eng Tut, ee Sak. Och hei gëllen d’Regelen vun der Arithmetik, der Additioun. Well all Eenzelnen gëtt gebraucht.  Vläicht kann een awer de Räiskär sinn, deen de Räissak ëmfalen deet vun deem dann de Päiperleck fortlitt an ee Wandstouss an ee Stuerm ausléist. Ee Stuerm vun Innovatioun, Dynamik an Handlung a gréngen Technologien.

Dat zweet : et hänkt vum Standpunkt of: mir sinn nämlech, deemno wéi een et kuckt éischter eng Calebasse. Ech denken un de nationalen overshoot day, onsen ekologesche footprint. Fir mech ass deem seng Dimensioun pro Kapp eng moralesch Verpflichtung pro Kapp fir ze handelen.

Net just fir Eurososlar, mee fir ons all ass d’Energietransitioun eng Erausfuederung, een défi technique. A Mengen Aën ass se och een défi de souverainté, fir Lëtzebuerg, fir Europa, fir ons all.

Merci

Dat gesot, nach e puer Merciën :

  • All Deenen déi hir Kandidatur eragereecht hunn. Dir weisst wat méiglech ass.
  • Merci dem Jury, also de Kollegen aus dem Comité, kompetent verstärkt duerch d’Semiray Ahemedova, Députéiert an Architektin, dem Gilbert Theato, Direkter vun Eurosolar an dem Marc Thein, President vun der Fédération du Génie Technique.
  • Merci der Chambre des Métiers, dem Gilles Reding a sénger Equipe,  fir den Accueil a Wëllkomm hei am Haus.
  • Merci onse Partner vum Solarpräis, dem O.A.I., der Chambre des Métiers, der Fédération des Artisans, der F.G.T. a myenergy.

Ee besonnesche Merci, elo vläicht Manner fir den Owend, mee fir säi Wierken insgesamt, dem Grënnungpresident a laangjähregen President an Eierepresident vun Eurosolar, dem Henri Kox.

Dat war et vu mir. Eng Ried soll jo net éiweg daueren, mee éiweg verhale ginn. Merci.

Hei klicken fir méi vum Solarpräis 2021

Kategorien
Corona Demokratie Energie Eurosolar grengwierkt Mobilitéit Partizipatioun Sport stadlëtzebuerg zesummenhalt

et ass wéi et war

Well ee bei 2020 jo net wosst, wou een drunn war, wat nach alles geng kommen, hunn ech léiwer gewaard mat mengem Joereabschlussbericht, bis dann och wierklech Schluss war mat dësem Joer, also dem läschten.

Januar 2020

De Januar huet ugefaangen mat Konscht (an der Villa Vauban; Museum K20 Düsseldorf foodforthezens), mat diversen Neijorsréceptiounen (gréng, Schaff) an engem flotte Spazéiertuer mat de Stater gréng, dem Besuch an der Moschterfabrik am Pafendall an een Owesiessen. Esou Saache ware virun engem Joer nach méiglech. Verreckt!

D’Citoyen konnten an der Gemeng um Knuedler Projeeë kucken, déi de Schäfferot ausschaffe gelooss hat, fir d’Terraiën rondrëm de Josy Barthel Stadion op der Areler Strooss nei ze bebauen (Participatiounstaxonomie Niveau 1). Ech erlabe mir drunn z’erënneren, dass een Atelier, deen déi gréng Stad 2018 organiséiert haten, e.a. gewisen huet, dass d’Participatioun op engem méi héijen taxonometresche Level d’Demokratie stärkt. Dat huet sech och gewisen bei enger gutt besichtener Diskussiounsronn vun eisstad asbl zu dem Thema Enn Januar. Ech sinn dofir. Jo, et ass och richteg, vill Leit wëllen net matschwetzen. Si konzentréieren sech dorops, dass et hirer Famill, gutt geet, si eng flott Zäit ma hire Frënn kënnen hunn. Si wëllen einfach just dat Richtegt maachen. Dat ass awer kee Grond, fir quasi keng Participatioun zouzeloossen.

Februar 2020

Deemols am Februar, an der Pre-Covid 19 Ära, war ech wéi stets, fläisseg op der Schaff a sinn an Versammelungen gang. Bei engem Kuerztripp op Gent, hun ech dem Jan Van Eyck seng Molkonscht bewonnert an hunn déi flott belge, velosgerecht Stad an och d’Fritten do genoss. Heiheem war de Mudam nees ee Besuch wert, och well et konschtméisseg anescht ass wéi  zu Gent. Mir vun de stater gréng haten op enger PK nees rieds vun  engem ekologeschen Quartier um Site vum Josy Barthel Stadion, mat Wunnraum, deen ze bezuelen ass a wou d’Leit kënnen matschwetzen vun Ufank un.

Zesumme mam Claudie Reyland, därf ech nees d’Co-presidence vun déi gréng Stad hunn.

D’Virbereedungen fir den internationale Fraendag sinn am gaang. An der JIF Organisatiounsplattform këmmeren ech mech em d’Mobilisatioun vun de solidaresche Männer. Et geet jo net just ëm “Fraleit”, mee och em “Maansleit” oder LGBTIQ+, mee dorëms selwer bestëmmen ze kënnen*. Dat ass den Ausgangspunkt. Dofir sinn ech um, a steet och de Festival des migrations, des cultures et de la citoyenneté.

März 2020

Ufank März war de Fraëstreik am Kader vum internationale Fraendag. Dausende Leit hu matgemaach. Am Fokus stoung d’care Aarbecht. Dese Begrëff steet fir déi Zort Aarbecht, bei der sech em aner Leit gekëmmert gëtt, fir si gesuergt gëtt, mat hinnen, bei hinnen. Et limitéiert sech net nëmmen op déi bezuelten Aarbecht. Et ass ee breede Spektrum vu « care » Beruffer an deenen zum groussen Deel Fraë schaffen, oft aus der Migratioun, mat sozialen Ongläichheeten, net esou bezuelt wéi hir systemrelevanz et verlaangt. Des Systemrelevanz huet sech du jo och gewisen. Et ass ugefaange gi mat applaudéieren. Meng Relevanz huet sech dora gewisen, dass ech op eemol méi Zäit hat a vill am foodforthezens war. Bleiw doheem!

Abrëll 2020

Et war roueg am Abrëll. Et ass flott ze gesinn wéi d’Blumme wuessen, wéi iwwerhat d’Natur opbléit am Fréijoer. Grad wéi mäi molereschem Äifer.

Ech ginn zum President vun Eurosolar Lëtzebuerg asbl gewielt. Eng Associatioun déi spezialiséiert ass an der Fotovoltaïk a sech fir erneierbar Energieën asetzt. Eng flott Aufgab an Erausfuederung fir et grad esou gutt ze maachen wéi den Henri Kox, deen 18 Joer laang President war.

D’Zäit vun de Videokonferenzen ass ugaang an déi vum Télétravail. Jo, Télétravail ass eng gutt Saach. Et ginn eng ganz Parti gutt Grënn, déi dofir schwetzen, grad wéi et och Désavantagen a Schwiregkeeten domadder gëtt. Och heiranner, am Télétravail, wéi an enger ganzer Rei aner Domäner, huet de Coronavirus gemaach, dass et méi séier goung. D’Spezialiste ware gefrot. Et si Léisunge fonnt ginn. Provisoresch, improviséiert an temporaire. Vill vun dese Saache si séier a kreativ ëmgesat ginn. Et huet eben musse séier goen. Et ass séier gaang. Op alle Niveauën, an alle Secteuren, privat oder public. Zesummen a solidaresch. Esou wéi et an der Gesellschaft si soll.

Mee 2020

Am Mee ass et schafftechnesch nees ugerullt. E bëssen anescht wéi virdrunn awer ok.

Och ugerullt sinn Diskussiounen iwwer Fräiheet, Onfräiheet, zu eppes gezwonge ginn an enger fräier Gesellschaft, an enger Demokratie. Dat ass ee wait Feld, voller Koufläpp a Minnen. Méi doriwwer hei.

Fir ze weisen, dass een och vun Doheem aus ka sënnvoll a produktiv schaffen, hu mir vun de Stater gréng ee Webinar mat der Bréisseler Ministesch fir Mobilitéit, dem Elke van den Brandt, organsiéiert. Zu Bréissel, eng Stad fir den Auto gebaut, gëtt elo an eng Stad fir de Velo transforméiert. Do geet et. Hei an der Stad gëtt eng keng gréng Mobilitéitsschäffin.

Well et awer ee grénge Mobilitéitsminister gëtt, kann ech fein vun deem engen Enn un deen dat anert Enn vum Kierchbierg, mam Velo a main Zwergegaard furen am Quarier Gréngewald. Dee gëtt vu “Quartierstuff” géréiert, op Terrain, deen de FUAK zur Verfügung gestalt huet. Déi Äishelleg si Mëtt Mee laanscht, da kann ech elo Gromperen planzen. Ee ganzt Feld, enfin eng Parzell vun 3m2. 100 Deeg méi spéit ass Recolte.

Juni 2020

Während d’Gromperen wuessen, wéinstens Mol d’Geleef iwwert dem Buedem, wuesse keng Pop-up Veloweeër an der Stad. Dat geet net, gëtt gesot. Well et ass eng Festungsstad, wéi d’Buergermeeschtesch spéider beléiert. Festungsstied goufe net fir Veloë gebaut, dat sollt e wëssen. Esou Stied goufen sécherlech fir S.U.V. geplangt, deemols 963. Et ginn der, déi verpasse ni eng Geleeënheet, eng Geleeënheet ze verpassen.

Wat Rassismus a Xenophobie ubelaangt : eng Urban Art Creatioun, net wäit vum foodforthezens, bei der Gantebeensmillen, brengt et op de Punkt.

Juli 2020

Ufank Juli geet eng Zäitfënster op an et eraus an déi wäit Welt, bei meng Meedercher an hir Studentestied. Mam Zuch geet dat fein. Mam Anouk feieren ech säi Gebuertsdag op der Biergartenterrass vun engem Restaurant beim Hofgarten zu München. Mam Cathie feieren ech säin Ofschloss vum Medizinstudium an engem Studentelokal am 12. Bezierk zu Wien. Et si zwou Stied mat ganz vill Konscht a Kultur, bannen a baussen. Wonnerbar.

Een Tëschestopp war zu Konstanz um Bodensee. Do ass manner Konscht, dofir méi Querdenker. Am Fong ass anescht denken, eben net ëmmer nëmme maache wéi se all, jo eppes Guddes. Zum Beispill wir soss jo d’Rad ni erfonnt ginn. Et ass awer eppes Aneschters just ze gleewen well een eben mengt oder eppes héieren huet, oder ze gleewen wat d’Wëssenschaft seet. Wëssenschaft sammelt Fakten, net Meenungen a si analyséiert dann des Fakten.

Een Avantage vu mam Zuch furen ass, dass een dann fein Zäit huet fir ze liesen, zum Beispill esou Bicher wéi “Zieht euch warm an, es wird heiss” vum Sven Plöger. De Meteorolog aus der däitscher Televisioun schreiwt iwwer d’Klimakris. Déi gëtt et och nach ëmmer. Si mécht keng Paus. Dowéinst musse mir der Wëssenschaft nolauschteren. Bei Corona a Klima musse mir parallel denken an handelen fir dat Richtegt ze maachen. Déi zwou Krisen si schwiereg ze kommunizéieren, well se komplex sinn, well et komplex ass. Et ass méi einfach schlicht Behaaptungen an d’Welt ze setzen. Nees doheem ass mäin éischten large scale Test negativ. Dat stëmmt mech positiv.

August 2020

Huch! De Gruef an der Stad gëtt dach tatsächlech, vum 1. August un, fir e puer Wochen, provisoresch, eng Foussgängerzon. Gréng wierkt an awer ass et wéi de Max Weber deemols sot « Politik bedeutet ein starkes, langsames Bohren harter Bretter, mit Leidenschaft und Augenmass zugleich”.

D’Geleefs vun de Gromperenstäck an der Zwergeparzell am Quartier Gréngewald um Kierchbierg wiisst. Rondrëm de Schoettermarjal, bei mir direkt niewendrunn, wiisst och vill Kraut, do wou fréier Heiser stoungen, do wou opgeschott gouf, wéi Heiser, déi elo niewendru stinn an ech wunnen, gebaut si ginn, do wou ni eppes war awer eppes hikomme soll. Eng Zort Biotop ass entstan. Eng Parti Leit haten do eng Protestaktioun gemaach. Et geet em d’Erhale vun der Natur, em do wunne kënnen, em déi zwee zesummen, em dorëmms weem d’Stad gehéiert, em Participatioun, em schwetzt mateneen. Vun Ufank un.

Et wor esou am Summer, stoung alles an der Bléi, du rifft den Zense Polchen, seng Familjen op ee Fest, am foodforthezens zesummen, t’war fir ronn zeng Leit gedeckt. Liewen um Limit!

September 2020

Well dat mat der rue du Fossé als Foussgängerzon, während dem Provisorium, esou gutt fonctionnéiert huet, fanne mir vun de Stater gréng, dass een dat elo soll definitiv maachen.

Ech hun definitiv vill Äppel am foodforthezens a baken meng éischt Äppeltaart. Manner grouss ass d’Récolte bei de Gromperen. Si schmaache fantastesch.

Grad esou genéissen ech déi vill Konschtwierker an der Villa Vauban, dem Mudam, dem Musée um Fëschmaart an déi am Mëllerdall. De Vakanzebong ass agléist. Merci.

D’Basketball Saison geetlass. Mir, vum Basket Racing huelen, wéi all déi verantwortungsvoll a rücksichtsvoll Leit, déi néideg Hygiènesmesuren fir Spiller, Zuschauer a Bénévolen. Sport ass wichteg. Ech Mengen net de Sport als Spektakel, am Stil panem et circenses, mat iwwerbezuelten an iwwerbewerte Sportsherolden. Ech menge virun allem, Sport maachen well et gutt ass fir Härz a Longen, fir déi lokomotoresch Kierperkomponenten, fir Sozialkompetenz, fir Integratioun an Inklusioun, fir ze léieren Regeln an ze halen, och déi aktuel géint de Coronavirus, virun allem awer déi vun zesumme liewen a zesumme wierken.

Fir den GMMP Comptage (Global Media Monitoring Project) hat ech fläisseg mat fichéiert, well et wichteg ass fir serieux Medien, serieux z’informéieren, balancéiert an Inhalt a Form. 

Oktober 2020

Mir vun de Stater gréng, haten ons ugewinnt all Joer eng Rees an d’Ausland ze maachen, fir méi gescheit ze ginn, Inspiratioun ze fannen, Saache ze gesinn, déi et anzwousch anescht gëtt a déi an der Stad och fonctionnéieren missten/kéinten/sollten. Aus pandemesche Grënn si mir hei am Land bliwwen a waren an d’Minettemetropolen Kayl/Téiteng, Esch-un-der-Uelzecht an Déifferdéng. Mir ware mam Velo ënnerwee, am Reen, mat der Sonn am Härz. Ons Gehirer gutt duerchlëft, ware mir ganz rezeptiv fir déi vill gutt Projeeën: Energiekooperativen, Promotioun vu Kreativitéit, Méiglechkeeten an der Logementspolitik, Transitioun. Op onsen Etappen si mir awer och drunn erënnert ginn, dass et méi flott ass, am Schäfferot mat ze décidéieren, wéi just kënne Villes ze proposéieren.

Dat vum gedëlleg deck Brieder buren, hat ech jo schon virdrunn geschriwwen. Entspriechend war mir nees mam Velo bei de Kollegen vun ProVelo fir d’rue du Fossé (dat war fréier wuel de Gruef ausserhalb vun de Festungsmaueren) autofräi ze kréien.

A well d’Beem nach voller Äppel sinn, baken ech weider Taarten an iessen se och.

Well et ouni Konscht net geet, war ech zweemol an d’Philharmonie, zweemol Beethoven, grouss mam OPL a Krystian Zimerman (Pianosconcert’en 4 a 5), a méi kleng mat Frank Peter Zimmermann a Martin Helmchen (Violinsonaten). Op dem Daach vun der Philharmonie si Fotovoltaikmoduler: Sun to power to music. Hei am Land ginn et ronn 146.000 Gebeier vun deenen bal 80 % gëeegent sinn, fir Solarstroum ze produzéieren. Ee Potenzial vun 3.540.000 KiloWattpeak. Dat ass vill.

November 2020

Den 11.11. hat ech mäin éischten Optrëtt als President vun Eurosolar Lëtzebuerg. Mir hun zesummen mat myenergy a Vertrieder vum O.A.I., ee Guide presentéiert, dee weist, wéi ee Fotovoltaik an Architektur flott mateneen kombinéiere kann. Mei doriwwer hei.

Den 11.11. feiere vill Leit den Ufank vun der Fuesend. Vum ville feieren ereechen si dann de Kipppunkt. Dest Joer ass dat awer ausgefall. Net ausgefall ass d’Angscht virun de Kipppunkten an der Coronakris an an der Klimakris. Also de Moment wou d’Saachen ausser Kontroll geroden. Bei der Covid-19 Kris sinn dat virop d’prise en charge vun de Leit déi krank sinn an d’Käschten. Deen zweete Volet bedengt nawell gär d’Capacitéit vum éischten. Bei ons ass dat manner de Fall wéi am Ausland an dat ass och gutt esou. Et soll jo net sinn, dass d’Ekonomisten décdiéieren wat medizinesch indiquéiert ass.

De  Kipppunkt bei der Klimakris ass de Moment wou den zevill vun CO2 an d’Erderwärmung et fir de Mensch schwiereg mécht, fir op der Erd ze wunnne. Och nom Kippen, dréint d’Erdkugel weider hir Ellipsen rondrëm d’Sonn, iwwertdeems d’Fro déi sech stellt, ass déi vun de Menschen hirer Resilienz. Wivill hält de Mensch aus?

Wivill Videokonferenzen hält de Mensch aus?

Den traditionnellen Salon vum C.A.L. am Tramsschapp huet och dest Joer ee flotten Iwwerbléck iwwer Konscht zu Lëtzebuerg.

Dezember 2020

Am Dezember ass eng Zort Endzäit Atmosphere an der Loft. Entweder well jiddereen iergendwéi frou ass, wann d’Joer 2020 eriwwer ass. Vläicht ass et och well mir wëssen, dass mir an een down gelocked ginn. Fir mech schwéier ze verstoen. Net Noutwendegkeet vun strenge pandemeschen Mesuren, mee, merde alors : wat ass net ze verstoen bei de gestes barrières ? Si si keng rocket science ! Oder et ass d’Angescht virum Coronakipppunkt.

Gutt Nouvellen, toute proportion gardée, gëtt et am Handelen géint de Klimakipppunkt : den Tram fiirt elo vum nordöstleche Stater midfield, dem Kierchbierg, queesch duerch d’Festungsstad, op der aner Säit nees eraus, quasi bis an déi fréier Gemeng Hollerech, also op d’Stater Gare. Ee Puzzlesteck fir eng aner Mobilitéit, manner CO2 lasteg, méi zilorientéiert a pragmatesch wéi déi bis elo pathetesch statussymbolesch.

D’rue du Fossé ass entretemps, um Pobeier, an eng zone de rencontre ëmgewandelt ginn. Elo nach ee klengen architektonesch-urbanisteschen Effort a si ass et och visuell.

De François Benoy weisst mat senger Budgetsried-analyse an der Chamber, dass hien och ee Top Finanzminister ka ginn.

Ech ginn dogéint bei de Coiffeur, nach huerteg eng läschte Kéier virun de Feierdeeg an dem lockdown (bei mir falen awer keng Locken méi down).

D’Feierdeeg ginn besënnlech, gemittlech, friddlech. Ech verbrenge se am foodforthezens zu Poliarritz.

Januar 2021

Et ass elo alles nach nei an awer och gewinnt. Dat ass gutt esou, well de Mensch brauch jo seng Komfortzone. Mir Mënschen si nawell Gewunnechtsdéieren. Déi gutt Noriicht deemno: mir kënne ons Gewunnechten, déi mir déi läscht Wochen a Méint léif gewonnen hunn, och nach eng Zäit bäibehalen: Mask un, 2 Meter Ofstand, Patte wäschen. Net komplizéiert awer recommandéiert, well soss komme mir ni eraus aus deem „no vir a nees zreck“. Da gëtt geimpft géint Covid-19. De Vaccin géint d’Klimakris gëtt et och: d’Fotovoltaïk. Dee géint den Onverstand ass d’Wëssen.

Dat geschriwwen: alles Guddes, Léiwes a Lëschteges 2021. Alles gëtt gutt.

*“Mit den Haien streiten”, CID Fraen an Gender, capybarabooks, ISBN 978-99959-43-16-5, 2018.

** “Zieht euch warm an, es wird heiss”, Sven Plöger, Westend , ISBN 978-3-86489-286-8, 2020

Kategorien
Energie Eurosolar Partizipatioun zukunft

Logement a Klima an archiPV

Dëser Deeg hat ech mäin éischten Optrëtt als President vun Eurosolar Lëtzebuerg. Mir hun zesummen mat myenergy a Vertrieder vum O.A.I., ee Guide presentéiert, dee weist, wéi ee Fotovoltaik an Architektur flott mateneen kombinéiere kann. Also, ee Guide iwwer déi zwee Haaptsujeeën, déi d’Leit hei am Land zu recht, a meeschten beschäftegen, laut rezentem Sondage fir RTL a Wort: de Logement, d’Klimakris, deemno d’Zukunft vun de Kanner.

De « guide luxembourgeois d’intégration architecturale des panneaux solaires photovoltaïques » deen Eurosolar Lëtzebuerg zesumme mam O.A.I. (Ordre des Architectes et des Ingénieurs-Conseils), myenergy, den Handwierker hirer Kummer an hirem Verband, Greenpeace, dem Service des Sites et Monuments nationaux a Bâtiments publics gemaach hun, weist dass dat Ganzt méi ass, wéi just iergendanzwousch Solarmoduler opstellen. D’Komabinatioun Photovoltaïk an Architektur ass eng Teamaarbecht. 

Si ass virun eppes, wat vun Ufank un muss geduecht a geplangt ginn. Dat aus technësche Grënn fir z’évitéieren, dass ee Kamäin, eng Gaub oder soss eng Daachfënster, d’PV Moduler i.e. d’Stroumproduktioun, stéiert- Wéinst der Esthetik, déi mécht dass et och nach stylesh ausgesäit. Och aus finanzielle Grënn ass d’Aplangen avantagéis, net just duerch d’Hëllefe vum Staat, mee och well, wa gutt gemaach d’Solarpanneauë Elementer vun der Konstruktioun sinn an deeemno aner Baumateralien agespuert ginn. Schlisslech ass duerch de System vun der Aspeisung an d’Stroumnetz, d’PV Anlag och eng Zort Spuerbex.

Et geet och dorëmms den elektresche Stroum dohin ze brengen, wou e verbraucht gëtt, bei d’Leit, bei d’Schaff, d’Produktioun a d’Fabrikatioun. Et mussen och keng zousätzlech Flächen versiegelt ginn, wann ee d’Photovoltaïk op an a Konstruktiounen integréiert. Mir mussen fir d’Solarenergie méi vun de Flächen am urbane Raum profitéieren. 

archipv.lu („Archi“ wéi Architekt, „PV“ wéi Photovoltaik)

Gentle reminder : Solarenergie ass klimafrëndlech a gratis. Dat ass keng nei Erkenntnis. Des Iwwerzeegung louch jo och um Ufank vun Eurosolar Lëtzebuerg asbl. 1992 hun an der Handwierkerschoul e puer Enseignanën a Schüler sech Gedanken gemaach  iwwer d’Klimakris an wéi een do eraus kënnt. Si hun u Projeeë geschafft fir ze weisen wat mat Solarenergie méiglech ass. Dee bekannste Projet ass elo nach am Agank vun Lycée des Arts et Métiers ze gesinn, de Solarmobil. Dunn ass 2002 Eurosolar Lëtzebuerg asbl gegrënnt ginn.

Eurosolar huet sech dräi Missioune ginn : 

  • Um Lafenden ze sinn wat d’Entwecklungen ugeet vun der Technik, mee och den Impakt.
  • Bei Gesetzer, Reglementer a soss Politiken säi Pefferkär bäi leeën, d.h. sachlech a fachlech z’aviséieren.
  • Z’informéieren iwwer, ee Multiplicateur sinn vun dem Potential an de ganz ville Méiglechkeeten vun  der Photovoltaïk an och soss erneierbaren Energiën.

Informéieren iwwer de wéi, wat a wisou, maache mir e.a. mat Communiqueeën, via eurosolar.lu, an awer och vun elo un, mat Podcasten, Videoclip (Presskonferenz archiPV) ënnert dem Numm « d’Sonn am Stecker » (op Spotify).

Et geet net méi duer, d’erneierbar Energiën bei déi al, energietechnesch staark awer knaschteg a geféierlech Quellen, bäizesetzen, als zousätzleche Gadget oder Kiischt um Kuch. D’erneierbar Energien, virun allem d’Solarenergie, mussen déi aner ganz ersetzen. Wat mir éischter ufänken mat dëser Transitioun, emsou méi geschmeideg kréie mir së hinn. 

Kategorien
Corona Demokratie gutt liewen integratitiv zesummenhalt zukunft

Corona, CETA, Charel, Choix

Et war vill Rieds d’lescht Woch bei der 5. Debatt an der Chamber iwwer d’Coronakris, vun Eegeverantwortung. Also, dass den opgeklärte Bierger fräiwëlleg responsabel agéiert. 

Schon zënter Wochen gëtt explizéiert, a widderholl wourop et haaptsächlech ukënnt, à savoir social distancing, Nues a Mond verdecken, fir d’Matmenschen net ze bespruddelen an d’Hänn dacker wäschen. Och an der Chamber ass dat nees gesot ginn, grad wéi och firwat dass dat wichteg ass. Et gouf d’Hoffnung ausgedreckt, dass all Mensch elo verstanen huet an als verstännege Bierger, entspriechend handelt a sech behëllt.

Dës Présomptioun an Approche vum opgeklärte Bierger ass net méi wéi richteg, well mir wëlle jo all eescht geholl ginn. Mir si jo all gär mündeg Bierger déi wësse wat am beschten a wat gutt fir een ass. Schlisslech gi mir jo ganz vill drop trainéiert a si vu Natur aus drop ausgeriicht, mol als éischt dat Optimalst fir ons selwer ze sichen a kréien. 

Dat wat mir maachen ass d’Resultat vun engem Choix tëschend verschiddene, villen Optiounen Mir weiën of wat d’Konsequenzen si vum ganze Spektrum vun de verschiddenste Méiglechkéiten. Eben dat wat ee fir sech wichteg, relevant, décisif fënnt. Et ass ëmmer d’Resultat vun enger Wertung, also ob Eppes vill wichteg oder manner wichteg fir een ass. 

Déi Décisiounen sinn heiansdo méi spontan, intuitiv, aus dem Solar plexus eraus oder no engem Raisonnement. Mee iergendwéi hëllt een ëmmer eng Décisoun, obscho mir net onbedengt wëssen wat op ons zou kënnt, wat geschidd. Dat nennt ee „Risiko“. Dat nennt een Zukunft, also dat wat kënnt. Dat ass offen. Kee kann exakt viraussoe wat kënnt. Dowéinst ass de Risiko je nodeem méi grouss oder besser, esou kleng wéi méiglech. D’Konsequenze sollen optimalerdengs gënschteg fir ee sinn.

Well mir net eleng op deser Welt si, mee ons an enger sozialer Sphere bewegen, inkludéiert een d’Interessen vun den Anere mat an. Duerch d’Oplagen an de leschten Wochen, de Confinement, d’Quarantaine, egal wéi een et nennt, huet ee jo gutt gemierkt, wéi wichteg dëse sozialen Aspekt ass. 

An esou préift een dann, als opgeklärte Bierger fir fräiwëlleg responsable z’agéieren, op déi jeweileg Optioun och als Optioun vun en All acceptéiert ka ginn, respektiv ob mat deser, senger Optioun och een autonomt Liewen vun den anere Leit méiglech ass. Dat ass vereinfacht de kategoreschen Imperativ. Dat ass d’Rechter vun de Leit all. Grondrechter.

Esou ass dat mat Rechter, mat Richtlinnen, mat Regelen, mat Leitplanken: si hëllefen organiséieren an bidden eng Orientatioun. Dat ass wourop et elo ukënnt. Dat ass och de Grondgedanke vun CETA.

« CETA beschneid keng Grondrechter »* sot dëser Deeg um Radio een dee matverhandelt hat. De CETA vun elo ass wesentlech Verbesserung par rapport zum initialen Entworf well déi vill diskutéiert Schiidsgeriichter net privatiséiert gi sinn, mee no considérablem Drock, notamment vun der Zivilgesellschaft, anescht organiséiert gi sinn, mat Contrôle vun dem pouvoir public (hei) an och well hir Kompetenzen limitéiert gi sinn. Iwwer déi Saachen déi mir, als gréngen, wichteg sinn, décidéiere déi Schiidsgeriichter elo net. Net ze vergiessen ass och, dass et elo eng Verbesserung ass par rapport zu den Ofkommëssen déi et am Moment gëtt tëschend europäesche Länner an Kanada (hei).

Den Zäitpunkt vun der Ofstëmmung iwwer CETA an der Chamber war trotzdem schlecht. D’Optauche vum Coronavirus och. Dat hun déi zwou Saache gemeinsam, grad wéi och, dass an den zwee Fäll Regele fest geluecht gi sinn . Wann ee guer keng Regelen huet, bei Corona an och beim Handel, geet et duercherneen an drop an driwwer. Regelen dogéint hëllefen organiséieren an bidden eng Orientatioun. Dat ass wourop et elo ukënnt.

Als opgeklärte Bierger agéiert een da fräiwelleg responsabel: keng Corona a keng Ceta Regel vebidd mir fairtrade Biotomaten aus regionaler Produktioun ze kafen. Keng Corona a keng Ceta Regel zwéngt mech agroindustrielpestiféréiert Tomaten ze kafen.

Dem Charel Jean Philippe Joseph Marie Guillaume a senger Famill wënschen all dat Bescht a vill Freed mat sénge verstännege Matbierger, déi d’Balance fannen tëschend Eegenoptimisatioun an Altruismus. Bleift gesond a monter.

*Jean-Claude Juncker, RTL, Background am Gespréich, 9.5.2020, 

Kategorien
Uncategorized

Bréisseler Velosinspiratioun

E Mëttwoch, 13. Mee 2020 vu 19H00 un

Kuckt, lauschtert mat eran an discutéiert mat: ouni Aschreiwung (just d’Emailadress ass noutwendeg) : hei

La révolution du vélo à Bruxelles – Une inspiration pour la Ville de Luxembourg?

déi gréng Stad Lëtzebuerg ont le grand honneur de vous inviter à leur Webinar avec Elke Van den Brandt, ministre de la mobilité pour la région Bruxelles-Capital, Linda Gaasch conseillère communale de la Ville de Luxembourg et François Benoy, député et conseiller communal de la Ville de Luxembourg. 

Bruxelles, Paris, Berlin, Milan… partout en Europe, les villes rendent les rues aux citoyen.nes afin de désengorger les axes routiers, soulager les transports publics et promouvoir la mobilité active, en réponse aux enjeux de la crise du coronavirus.

Face aux embouteillages permanants et à leur pollution atmosphérique et sonore, la ministre verte a élaboré un plan ambitieux d’aménagement de nouvelles pistes cyclables sécurisées, de réorganisation de l’espace public en faveur des piéton.nes et a développé les offres des transports en commun.

Quelle est la vision de la ministre écolo? Quelles sont les leçons à tirer pour le Luxembourg et d’autres villes?

Kategorien
Corona mir-man-et-geschéien Partizipatioun zesummenhalt

Kreativ-Dynamik-Télétravail

Ir een elo ka kucken wéi ech mech bei méngem éischten Téléinterview geschloen hun (jo, ech kann dat besser), e puer Gedanken zu Thema.

Jo, Télétravail ass eng gutt Saach. Eng ganz Parti gutt Grënn ginn vun de verschiddenen Leit an desem kuerzweilegen an informative Reportage opgefouert, grad wéi och op Désavantagen a Schwiregkeeten higewise gëtt. Och heiranner, am Télétravail, wéi an enger ganzer Rei aner Domäner, huet de Coronavirus gemaach, dass et méi séier goung. Et si Léisunge fonnt ginn. Provisoresch, improviséiert an temporaire.

Vill vun dese Saache si séier a kreativ ëmgesat ginn. Et huet eben musse séier goen. Et ass séier gaang. Op alle Niveauën, an alle Secteuren, privat oder public. Zesummen a solidaresch.

Dat wat den éischten Deel. D’Urgence. De Confinement

Elo gëtt vill geschwat, discutéiert an hypothetesch extrapoléiert iwwer de zweeten Deel. Et ginn elo vill Experten, vill savant Kalkülen. Do ass et mam zesummen a mam Solidareschem schon anescht. 

Dat erënnert mech iergendwéi an awer just entfernt, un d’Klimakris: mee d’Gewiichtung ass zum Deel anescht. Dringlechkeet vun der Situatioun ass ähnlech, awer d’Vitesse mat der réagéiert gëtt, ass vill méi lues. Mee ëmmerhin, elo ass et zum Beispill a ville Stied an Däitschland méiglech, Deeler vu Stroossen als sécuriséiert Velosstreck em ze fonctionnéieren. Et geet wann ee wëll. Dat geet och an der Stad wann ee wëll. Hélas! 

Wéi den Télétravail oder homeoffice oder déi provisoresch Kliniken oder de shutdown, sinn oder wiren och d’Velosstrecken temporaire zäitlech begrenzt. Et sieff dann, dat wat en urgence implémentéiert ginn ass, geng seng Preuve maachen. Da gëtt et d’Optioun fir de Provisioire duréieren ze loossen an et gëtt d’Méiglechkeet, driwwer nozedenken wat bleiwe soll, wat direkt fort kann oder nees lues a lues ofgeschaaft gi kann, wat ee preventiv brauch, wat guer net. An da geet et dorëms Gescheck ze maachen.

Déi Décisiounen  ginn da geholl no échange d’idées, op Fakte baséiert,  am Konsens. Lobbydinös Ergüss a just d’Recht vun deem déi méi staark ass, si net zweckméisseg. Dofir awer Solidaritéit. Beim Corona a beim Klima. Mir hun déi lescht Woche gewisen, dass mir dat kënnen. Mir kënnen et och duerno. Mee mir si nach net duerno, mee matzen drann..

Nach besser kann ech och esou Interviewën: Hei

Merci Sarah, Laura a Lionel.

Kategorien
stadlëtzebuerg zesummenhalt zukunft

Corona geet ons all un

Um Knuedler an der Stad, stoung haut d’Coronakris am Mëttelpunkt. Et geet drëms ze hëllefen an zesummen a solidaresch sech géigesäiteg z’ënnerstëtzen. Dofir hun d’Vertrieder vun déi gréng am Stater Gemengerot eng ganz Rei Virschléei gemaach a Froë gestallt, dat goung vun besonneschen Hëllefen fir déi Leit, déi et souwisou scho schwéier hun bis zu temporaire Velosweeër. A well „la meilleure pédagogie se fait par la répétition“, ass och eng Informationsbrochure a verschiddene Sproochen an all Bréifkëscht an der Stad, eng gutt Saach. Och sollt de Stater Geschäftsleit gehollef ginn. Dat a nach vill méi hei

Kategorien
Demokratie Kreativitéit mir-man-et-geschéien zesummenhalt zukunft

Verzichten oder profitéieren, … dat ass d’Fro

De President vun de Propriétairen hei am Land, mengt an engem Interview um 100komma7 (hei) et soll een als Propriétaire virleefeg net op de Loyer verzichten. Aus Däitschland gëtt gemellt, dass eng ganz Rei Konzerner keng oder manner Loyer bezuele wëllen.

Ech hat geduecht, dass an dëser aussergewéinlecher Situatioun, mir ons all sollen e bëssen zréck huele, mir si jo an enger situation de crise an dass mir am beschten hunn, zesummen ze halen. Dat kéint dann heeschen, dass déi Staark déi Schwaach ënnerstëtzen : deen deen eppes méi huet, verzicht, temporaire oder ganz oder deelweis, op eppes. Deen anerer kritt doduerch e bësse Sputt an d’Chance déi schwireg Zäit, de momentane Manktum, z’iwwerbrecken. All d’Moossname vun der Regierung sinn dorop ausgeriicht. Well et ass just iwwergangsweis.

A Krisesituatiounen kënnt och jidderengem säi richteg Charakter eraus. Déi meescht sinn jo wueltemperéiert, mat e bësse der enger Eegeschaften, e bëssen der aner. Alles ausbalancéiert. Alles gutt. Trotzdeem ginn déi eng nervös an hektesch, anerer zéie sech zréck, anerer gi generéis an hëllefsbereed, anerer gi gurmangsesch, anerer ginn iwwerluecht vir. Et kann een zB. iwwerleeë wéi een am beschten hëlleft.

Anerer iwwerleeë par konter, wéi si vun dëser Krisesituatioun profitéiere kënne.

Wéi dat geet exercéiert de Propriospresident an och divers Konzerner. D’Gurmangsechkeet dans toute sa splendeur. De Propriospriosaffekot réit sénge Leit weider z’encaisséieren. Dat généréiert par ricochet d’Persepktiv fir als hire juristesche Beroder ze figuréieren, méiglecherweis och fir dann, wann e Locataire net bezillt, dem Propriétaire séng Rechter hëllefen anzekloen a fir, évidemment, och fir een zünftege Mietvertrag opzesetzen mat engem neie Locataire, nodeems hie gehollef huet, deen dee während dem Engpass net bezuelt hat, eraus ze puchen. Et ass jo alles juristesch rechtens. Dat ass da fir hien win-win-win. Fir hien a fir déi déi hie bezuelen. Wat mech un dat Lidd erënnert « wessen Crémant ich trink, dessen Lied ich sing ».

Et schéngt awer och, esou steet am Lëtzebuerger Land vun dëser Woch (hei) verschidde Propriétairen ze ginn (iwwriens: Propriétairen sinn och mat an der Kris, musse sech Gedanke maachen, hun investéiert a si sollen och net zum beschte gehale ginn), déi méi sozialkompetent si, wéi deen dee si représentéiert : Désinfectant a Plaz Vodka. Well déi hu verstanen wourop et ukënnt elo.

Si distinguéire sech op des Manéier och zB vun GM, deen Autoskonzern, dee virun nach net all ze laang mat Steierdollaren gerett ginn ass an elo kalbliddeg eng Milliard Dollar verlaangt hat, fir Beotmungsgeräter ze produzéieren an dëser Noutsituatioun. Haaptsaach de shareholder geet et gutt. Deen vun GM oder deene vun Adidas.

Verschidde Propriétaire maachen och dat wat si kënnen : kreativ no Léisunge sichen a fannen. Och dat distinguéiert si positiv vun deene à la Donald, Jair, Boris, déi mengen et fir eng Saach vu just e puer Wochen („eng ‚Durststrecke‘ do ass, vu 14 Deeg„) oder fake news.

Alles gëtt gutt.

Kategorien
Demokratie Sophismus

Mäi Versteesdemech

Fir dass ech et richteg verstinn: déi gréissten Oppositiounspartei, d’CSV, profitéiert gär vun der Diskussioun iwwer dem Roberto T. sénger nonchalaner an onseriöser Gaardenhäip Upgrade Aktioun, mat hirer Motioun déi verlaangt, fir all déi illegal Konstruktiounen ze légaliséieren an esou, par ricochet oder d’hënnescht Dir, hir Politik vun de leschte Jorzéngten weider ze féieren, nämlech Zersiedelung vum Land.

Ausserdeem ka si esou all deenen, déi an der laanger Vergaangenheet vun hirem Staat servéiert gi sinn, eng Zort Ofsécherung bidden. Klientelismus après la lettre, enfin, après régence, aus der Oppositioun eraus. Do so nach een aus der Oppositioun eraus kéint ee näischt fir séng Leit bewierken, also probéieren ze bewierken.

Dass d’Beem déi dobäi gefällt ginn a goufen, hinne nawell eklektesch egal sinn, ebe je nodeem ob et si arrangéiert zum Beispill fir eng Strooss ze bauen, déi hirem Duerf hëlleft, wéi den honorabelen LSAP MvP Georges Engel, et mat engem sourire narquois kommentéiert huet.

Och do an deemno, si maache weider mat hirer political rhetoric as usual: dat Eent soen an och de Contraire.