Kategorie: stadlëtzebuerg

Kategorien
Demokratie Kreativitéit mir-man-et-geschéien Partizipatioun stadlëtzebuerg

The Signature of Civilizations

Déi läscht Wochen war a Saache Kultur nawell vill lass hei am Land : de Salon du CAL (Cercle Artistique de Luxembourg), dee säin 125. Gebuertsdag feiert, d’Luxembourg Art Week, d’Ausstellung “Viv(r)e la matière » vis-à-vis vum Rousegärtchen, d’Walfer Bicherdeeg mam Lëtzebuerger Buchpräis, d’Zeremonie vum Lëtzebuerger Filmpräis, a besonnesch, zënter Enn September a bis Enn Januar 2022, am Casino « Stronger than memory and weaker than dewdrops ». Ufank Dezember war an de Rotondes d’Fotoausstellung « Les conséquences » iwwer Féménicide a nach ëmmer am Citymuseum « Gleef dat net… !» bis Mëtt Januar 2022. Bis Ufank Januar gesäit een am Kader vun “La vie ..more or less Part 1 » Fotoën vun an iwwer de George Edward Nixon op der Stroossbuerger Plaz an der Stad.

Elo kënnt Esch2022, iwwer dat d’Elke Buhr, Chefrédactrice vu « Monopol, Magazin für Kunst und Leben am Extraheft vum Dezember 2021 geschriwwen huet « Im Zentrum steht die Zusammenarbei : zwischen Kulturen, zwischen Regionen, zwischen Bevölkerungsgruppen und Generationen. »

“ Art is the signature of civilizations ”

Tëschend dësen Ausstellungen an dem Beuys sénger Ausso, dass Jiddereen ee Künstler ass, läit ee Wee a mir vun déi gréng Stad Lëtzebuerg haten ons den 21. September 2021 bei enger Table ronde am Sang a Klang am Pafendall mat dësem Wee, zumindest een Deel dovunner, beschäftegt. De Robert Garcia (Roga) huet mam Antonia Ganeto (Finkapé), Claire Wagner (ASPRO), Paul Thiltges (Produzent) an Ainhoa Achutegui (Directrice Abtei Neimënster) diskutéiert. Och d’Sam Tanson, Kulurministesch an d’Claudie Reyland, Gemengeconseillère an der Stad hunn hir Iwwerleeungen présentéiert.

Hei meng Intro vum Owend

Léif Alleguerten, bonjour toutes et tous, chez Konscht pour toutes et tous.

Pour les personnes préférant suivre le débat en français, des écouteurs sont à votre disposition. La traduction est assurée par les spécialistes du service « traduction orale directe » de l’Asti. Merci beaucoup.

A fir géint den Duuscht ass och gesuergt. Ech hat am Ufank geduecht, dass Konscht wéi Sport, eppes emotionales ass, dass eventuel kéinten am Laf vun der Diskussioun Fläschen a Glieser geflu kommen. Mee ech gesinn, dass et anescht schéngt ze goen. Dofir dir kënnt iech elo och schon eppes huelen fir ze drenken.

Dat gesot, ech hunn Haut gesinn, also Haut hunn zwee Graffitti Künstler, de Raphaël Gindt an den Daniel Mc Lloyd, um ale Kierchbierg, um Busarrêt Paul Noesen, ee Graffiti gemoolt an zwar ee grouse Fëschreiher, op eng Wand vun engem Haus, een aalt Bauerenhaus, dat geschwënn ofgerappt gëtt.

De Paul Noesen war ee Schrëftsteller vum Enn 19., Ufank 20. Jorhonnert. Déi zwee Graffitti Kënschtler agéieren elo. Si hunn de Reiher gemoolt wéinst dem Paul Noesen senger Kuerzgeschicht “Reiherjagd”. Do mierkt een wéi sech alles mateneen verbanne kann, also dat Haus, dat gëtt elo geschwënn eng Kéier ofgerappt, dann ass déi Wand fort, dat Haus geet op Architektur, Architekturkonscht zréck. De Graffitti ass elo.

Dat wat ech soen well: et deet ons all gutt, wa mir ons mat Konscht beschäftegen, well op der enger Säi, wéi se an “les intouchables” soen, dass Konscht déi eenzeg Trace ass déi mir bei onsem Passage op der Erd hannerloossen, op der aner Säit ass et allerdings och esou, dass Kënschtler*innen zum daxten ee ganz rengt Gespiir, ee feinen Sensorum hunn, fir dat wat sech an enger Gesellschaft ofspillt. Dëse Spigel, dee mir virgehale kréien, ass gutt fir ons Alleguer, fir deen Eenzelnen, fir Jiddereen, soll dann och déi entspriechend Plaz hunn.

Wat den Owend ubelaangt: vill Leit, net nëmmen déi Stater gréng, stelle sech d’Fro op d’Kulturpolitik vun an an der Stad Lëtzebuerg, den Usprëch vun enger zäitgeméisser Kulturpolitik an och enger Kulturentwéckelungsstrategie gerecht gëtt.

Ier een awer elo deen éischte Stee pucht, vläicht och als Oppositiounspartei, soll ee sech awer och agestoen, dass keen, och keng Partei, den Usproch erhiewe kann, déi ultimativ Äntwert, Äntwerten, ze hunn.

An deem Sënn, ass och net ze fréi, fir elo schon, am Virfeld vun de nexten Walen, dat zwar nach iergendwéei an engen fernen Avenir ze si schéngt, mee awer scho ganz no a si kommen, méi séier wéi mir mengen, Froen eben iwwer eng zäitgeméiss Kulturpolitik op ze werfen.

Well iergendeng Kéier 2023 bis de Walprogramm warden an op Twitter as soss soziale Medien dann an e puer Zeilen dat dann ze résuméieren, gëtt der Konscht net gerecht.

Duerfir werten mir ons vläicht, hoffentlech, no der animéierter Diskussioun zur Konklusioun kommen, dass dës Gespréichsronn just een éischten Tur ass. Um Enn vun dësem owend wärte mir ons eens sinn, dass mir bis 2023 nach déi eng oder aner Kéier musse noleeën. Och mat engem kontradiktoreschen Débat, och mat verschiddene Parteien an soss interesséierten Persounen.

Genug vu mir, ech ginn d’Wuert elo weider un d’Claudie Reyland, Claudie an ech maachen d’Presentatioun den Owend als Co-President*in vun der Lokalsectioun. Merci

Diskussioun (no der Intro) hei. Deen éischten dee schwetzt, ass de Robert Garcia “Roga”. Leet Iech zréck mat engem Patt a genéissst déi 2H16 Diskussioun.

De Reportage um 100komma7 hei

De Saz “art is the signature of civilizations” gëtt je no Source, dem Jean Sibelius, finnesche Komponist (1865-1957) aoder der Beverly Sills, US amerikanesch Soprano an Opernsängerin  (1929-2007) zougeschriwwen.

Kategorien
Energie enmarcheopdeknuedler grengwierkt Mobilitéit Partizipatioun stadlëtzebuerg zukunft

Klimaziler fir d’Stad Lëtzebuerg

De 5. November hunn d’Linda Gaasch, de François Benoy an ech fir déi gréng Stad Lëtzebuerg konkret Proposen virgestallt fir eng klimaneutral Stad Lëtzebuerg. Hei meng Présentatioun:

Wa mir vun enger klimaneutraler Stad schwetzen, dann inkludéiert dat eng ganz Parti Elementer: de François Benoy huet elo vun engem aneren Urbanismus geschwat an och enger anerer Mobilitéit. Des aner Mobilitéit huet e.A. mat der Reduktioun vun onsem Appetit un Energie ze dinn. D’Linda Gaasch schwetzt duerno iwwer den intelligenten Verbrauch vu Ressourcen, also och der Reduktioun vum Appetit un Energie an och wéi mir zesummen bei eng klimaneutral Stad kommen.

Esou eng klimaneutral Stad huet och oder villeicht ganz vill, mat dem Gebrauch vun aneren Energien wéi déi vun bis elo, ze dinn. Et geet jo em net méi oder manner, wéi déi gesamt al Energien, duerch erneierbar Energien ze ersetzen.

Dat heescht: et muss ee genug „produzéieren“. Also Energie aus erneierbaren Quellen opbereeden, fir dass se fir ons notzbar ass.

Ech erënneren un Leitsaz dee mer aus de Chimie a Physik kennen: « rien ne se crée, rien ne se perd, tout se transforme » (Bsp : fir 7. Liter Bensin op ze bereeden fir 100 km furen ze kënnen, sinn 11 KWH Stroum néideg, genug fir 65-85 km mat E-Auto ze furen). Et geet also em Transformatioun, mat der Nuance, dass déi final Transformatioun, déi mir Verbrauch nennen, bei den erneierbaren Energien, keng Zäregasen, keen CO2, produzéiert. De Challenge ass, dës Transformatioun esou geschmeideg wéi méiglech, dat heescht mat esou mann wéi méiglech Verloschter, hin ze kréien. Beim Solarstroum sinn des Verloschter relativ kleng.

Deemno fir d’Productioun sprech Transformatiouin, a grousse Quantitéiten, do eegent sech d’Photovoltaik am beschten. D’PV buet zudeem eng grouss Akzeptanz, well si ass moduléierbar en Fonctioun vum Besoin an relativ easy to treat. Anescht zwar wéi déi gewinnten Manéier, mee awer net komplizéiert. Si ass upassbar.

Och hei an der Stad mat hiren 20.000 Gebeier. Dovun, sinn der Ronn 800 d’Propriétéit vun der Gemeng. Dat ass eng grouss Zuel. Par contre a leider ass d’Zuel vun PV Anlagen op dëse Gebeier vun der VdL nawell kleng. Grad emol 2 % vum Potential gëtt profitéiert. Zirka 220 KWp Anlagen goufen bis elo installéiert.

Mir hunn ausgrechent dass awer ronn 10.000 KWp méiglech wiren.

Am Prinzip 800 – 1000 KWH pro KWp -> elektresche Stroum 9.000.000 KWStonnen (9.000 MWh) also fir ronn 2500 Haushalter oder 9.000 – 10.000 Leit. Oder genug fir de Fonctionnement vun alle Kläranlagen an der Stad oder dee vun de Pompelstatiounen, Sprangburen, Réservoiren, plus Eclairage public a soss Beliichtungen vun 2019 zum Beispill.

Et kënnt op all KiloWattStonn un. Et ass eng Aufgab vun ons all: vum big player, der Industrie bis deen eenzelnen. Wa méiglech mat enger Gemeng als Virbild, Virreider.

Well et op jiddereen, op all Daach ukënnt, hu mir och gerechent wat soss d’Potential ass vun all den Diecher an der Stad. Kleng gerechent, mam Solarkadatser op geoportail, komme mir do op 7.500 Heiser vun den 20.000 Heiser déi sech eegenen géngen. Dat ass net iwwerdriwwen..

D‘Ausriichtung vun den Heiser ass ee Facteur awer manner wéi un den Ufäng vun der PV, deemols als virun allem de Süden uviséiert ginn. Entretemps ass d’Technik, notamment d’Sensibilitéit vun PV Panneau esou gutt, dass een och mat Ost-West ausgeriichtenen Anlagen gutt Stroum ka produzéiert ginn. An der Moyenne kann een do 8 KWPeak Anlagen opriichten.

D’Rechnung ass einfach: 7500 x 8 : Also genug fir -> 60.000 KWp, deemno 60.000.000.000 KWh also fir bal 60.000 Persounen. Deemno kënne  ir an der Stad also eleng mat PV d’Halschend vum Elektresch Verbrauch vun de Bierger couvréieren.

Dofir fannen mir, dass bei déi staatlech Ënnerstëtzung fir eng PV Anlag, d’VdL och nach nach zousätzlech ee Ureiz schafe soll notamment bei den Installatiounskäschten.

Dat selwecht, also nach een zousätzlechen Ureiz, stelle mir ons och fir d’Installatioun vun emissiounsfräien Heizsystemer vir. Stéchwuert. Wärmepompel.

An da si mir beim zweeten Aspekt fir eng klimaneutral Stad: d’Systemer, déi bis elo mat den alen, net méi zäitgenässen Energien fonctionnéieren, op der nei, klimafrëndlech ëmstellen. D’Heizung ass esou ee System. An dat ass en domaine mat engem richtegen, gewaltege Impakt, well d’énergie thermique dat sinn 75 % vum CO2 an der Stad – wann een den Stroum net mat aberechent. Mam Stroum ass den Undeel  um CO2 vun der énergie thermique 56 %. De Stroum ass nach net décarboniséiert, mee huet awer een héicht Potential fir Décabornisatioun. Bei de fossilen Energieträger, déi fir ze hëtze benotzt ginn, geschidd dat mat 1/3 mat Mazout, 2/3 si Gas. Dat ass ee gutt Beispill fir eng noutwendeg, zäitno Ëmstellung, fort vun de fossilen.

Et fàllt engem och op, dass wieder de Gazrésau ausgebaut gëtt. Et gi wieder derer Leitungen geluecht Dat ass zwar wéi et ëmmer gemaach ginn ass, wéi fréier, mee net zukunftsorientéiert. Besser wier ee Wärmerésau, alimentéiert a gehëtzt aus marginal, der Iwwerproduktioun vu Solarstroum (während peak Stonnen). Op déi Manéier mécht een och eppes fir „flatten the curve“. Mir hu geléiert, dass dat wichteg ass. Méi ee grousst Potential dofir hunn awer Biogas an Holzpellets. Eng aner Alternativ ass fir vum Gazréseau fort ze kommen, wéi ech virdru schon ernimmt hat, Primme fir Wärmepompelen.

Et geet wéi gesot, dorëms de Fonctionnement vun de verschiddensten Systemer op klimafrëndlech ëmzestellen. Dat gëllt och fir de Fuhrpark vun der Stad Lëtzebuerg. 2 Prozent sinn elektresch. Och do ass ee groust Potential. Et soll ee sech näischt virmaachen: och des Ëmstellung muss kommen. Mee et kann een awer nach wieder Zäit verléieren. An de nexten Joeren stellt sech och d’Camionsproduktioun weltwäit ëm, vu Verbrennermotoren op elektresch. Am Bussecteur kenne mir dat jo schon. Technik ass do, d’Suen sinn et och. Et feelt vläicht den Interessi et ze maachen beim Fuhrpark.

Bon, elo kann ee jo der Meenung sinn, dass een als Gemeng net selwer soll PV Anlagen installéieren. Da fanne mir et soll een déi disponible Flächen, mir hun d’Rechnung virdru gemaach, deene Leit zur Verfügung stellen, déi keen eegene Daach hunn, zum Beispill als Locataire oder an engem Appartementshaus oder an enger Copropriétéit, fir awer aktiv un der Energietransitioun mat ze schaffen, een Deel dovun ze sinn. Ech schwetzen vun de Biergerkooperativen. De participative Volet. D‘Linda Gaasch schwetz herno iwwer déi Idee. D’Leit inkludéieren, mat abannen.

Ee vun der Energietransitioun, och hei an der Stad, ech hat e virdunn ernimmt, ass jo den Appetit un Energie erof ze setzen. Dozou gehéiert eng Auswertung iwwer d’Energiewerter vu Gebeier. Den Energiepass. Den Energiepass bei de Gebeier vun der VdL ass eng laang Geschicht Déi éischt goufen 2010 ausgestallt, zënter 2018 stagnéiert et a just d’Halschend vun de ronn 800 Gebeier hunn een. Déi éischt, déi ausgestallt goufen, riskéieren of ze lafen. Och eng Fro un de Schäfferot vum Carlo Back am Dezember 2019 huet keng concluant Äntwert bruecht. Net verstoen kann ech, firwat, dass net un deenen Gebeier wou d’Werter bekannt sinn, geschafft gëtt i.e. ne tun der sobriété énergétique vun deene Gebeier verbessert gëtt.

Dat gesot: fir ons ass et wichteg fir eng klimaneutral Stad ze ginn:

– Photovoltaik ze fördern, also d’Produktioun vun erneierbaren Energien.

– Gescheck ze maachen bei der Ännerungen vun de Systemer hin zu den erneierbaren Energien.

– manner Energie verbrauchen also d‘Ressourcen schounen, manner verbrauchen.

Merci.

Hei alles

D’Reportage op RTL hei

Den Artikel am Tageblatt hei

Kategorien
Corona Demokratie Energie Eurosolar grengwierkt Mobilitéit Partizipatioun Sport stadlëtzebuerg zesummenhalt

et ass wéi et war

Well ee bei 2020 jo net wosst, wou een drunn war, wat nach alles geng kommen, hunn ech léiwer gewaard mat mengem Joereabschlussbericht, bis dann och wierklech Schluss war mat dësem Joer, also dem läschten.

Januar 2020

De Januar huet ugefaangen mat Konscht (an der Villa Vauban; Museum K20 Düsseldorf foodforthezens), mat diversen Neijorsréceptiounen (gréng, Schaff) an engem flotte Spazéiertuer mat de Stater gréng, dem Besuch an der Moschterfabrik am Pafendall an een Owesiessen. Esou Saache ware virun engem Joer nach méiglech. Verreckt!

D’Citoyen konnten an der Gemeng um Knuedler Projeeë kucken, déi de Schäfferot ausschaffe gelooss hat, fir d’Terraiën rondrëm de Josy Barthel Stadion op der Areler Strooss nei ze bebauen (Participatiounstaxonomie Niveau 1). Ech erlabe mir drunn z’erënneren, dass een Atelier, deen déi gréng Stad 2018 organiséiert haten, e.a. gewisen huet, dass d’Participatioun op engem méi héijen taxonometresche Level d’Demokratie stärkt. Dat huet sech och gewisen bei enger gutt besichtener Diskussiounsronn vun eisstad asbl zu dem Thema Enn Januar. Ech sinn dofir. Jo, et ass och richteg, vill Leit wëllen net matschwetzen. Si konzentréieren sech dorops, dass et hirer Famill, gutt geet, si eng flott Zäit ma hire Frënn kënnen hunn. Si wëllen einfach just dat Richtegt maachen. Dat ass awer kee Grond, fir quasi keng Participatioun zouzeloossen.

Februar 2020

Deemols am Februar, an der Pre-Covid 19 Ära, war ech wéi stets, fläisseg op der Schaff a sinn an Versammelungen gang. Bei engem Kuerztripp op Gent, hun ech dem Jan Van Eyck seng Molkonscht bewonnert an hunn déi flott belge, velosgerecht Stad an och d’Fritten do genoss. Heiheem war de Mudam nees ee Besuch wert, och well et konschtméisseg anescht ass wéi  zu Gent. Mir vun de stater gréng haten op enger PK nees rieds vun  engem ekologeschen Quartier um Site vum Josy Barthel Stadion, mat Wunnraum, deen ze bezuelen ass a wou d’Leit kënnen matschwetzen vun Ufank un.

Zesumme mam Claudie Reyland, därf ech nees d’Co-presidence vun déi gréng Stad hunn.

D’Virbereedungen fir den internationale Fraendag sinn am gaang. An der JIF Organisatiounsplattform këmmeren ech mech em d’Mobilisatioun vun de solidaresche Männer. Et geet jo net just ëm “Fraleit”, mee och em “Maansleit” oder LGBTIQ+, mee dorëms selwer bestëmmen ze kënnen*. Dat ass den Ausgangspunkt. Dofir sinn ech um, a steet och de Festival des migrations, des cultures et de la citoyenneté.

März 2020

Ufank März war de Fraëstreik am Kader vum internationale Fraendag. Dausende Leit hu matgemaach. Am Fokus stoung d’care Aarbecht. Dese Begrëff steet fir déi Zort Aarbecht, bei der sech em aner Leit gekëmmert gëtt, fir si gesuergt gëtt, mat hinnen, bei hinnen. Et limitéiert sech net nëmmen op déi bezuelten Aarbecht. Et ass ee breede Spektrum vu « care » Beruffer an deenen zum groussen Deel Fraë schaffen, oft aus der Migratioun, mat sozialen Ongläichheeten, net esou bezuelt wéi hir systemrelevanz et verlaangt. Des Systemrelevanz huet sech du jo och gewisen. Et ass ugefaange gi mat applaudéieren. Meng Relevanz huet sech dora gewisen, dass ech op eemol méi Zäit hat a vill am foodforthezens war. Bleiw doheem!

Abrëll 2020

Et war roueg am Abrëll. Et ass flott ze gesinn wéi d’Blumme wuessen, wéi iwwerhat d’Natur opbléit am Fréijoer. Grad wéi mäi molereschem Äifer.

Ech ginn zum President vun Eurosolar Lëtzebuerg asbl gewielt. Eng Associatioun déi spezialiséiert ass an der Fotovoltaïk a sech fir erneierbar Energieën asetzt. Eng flott Aufgab an Erausfuederung fir et grad esou gutt ze maachen wéi den Henri Kox, deen 18 Joer laang President war.

D’Zäit vun de Videokonferenzen ass ugaang an déi vum Télétravail. Jo, Télétravail ass eng gutt Saach. Et ginn eng ganz Parti gutt Grënn, déi dofir schwetzen, grad wéi et och Désavantagen a Schwiregkeeten domadder gëtt. Och heiranner, am Télétravail, wéi an enger ganzer Rei aner Domäner, huet de Coronavirus gemaach, dass et méi séier goung. D’Spezialiste ware gefrot. Et si Léisunge fonnt ginn. Provisoresch, improviséiert an temporaire. Vill vun dese Saache si séier a kreativ ëmgesat ginn. Et huet eben musse séier goen. Et ass séier gaang. Op alle Niveauën, an alle Secteuren, privat oder public. Zesummen a solidaresch. Esou wéi et an der Gesellschaft si soll.

Mee 2020

Am Mee ass et schafftechnesch nees ugerullt. E bëssen anescht wéi virdrunn awer ok.

Och ugerullt sinn Diskussiounen iwwer Fräiheet, Onfräiheet, zu eppes gezwonge ginn an enger fräier Gesellschaft, an enger Demokratie. Dat ass ee wait Feld, voller Koufläpp a Minnen. Méi doriwwer hei.

Fir ze weisen, dass een och vun Doheem aus ka sënnvoll a produktiv schaffen, hu mir vun de Stater gréng ee Webinar mat der Bréisseler Ministesch fir Mobilitéit, dem Elke van den Brandt, organsiéiert. Zu Bréissel, eng Stad fir den Auto gebaut, gëtt elo an eng Stad fir de Velo transforméiert. Do geet et. Hei an der Stad gëtt eng keng gréng Mobilitéitsschäffin.

Well et awer ee grénge Mobilitéitsminister gëtt, kann ech fein vun deem engen Enn un deen dat anert Enn vum Kierchbierg, mam Velo a main Zwergegaard furen am Quarier Gréngewald. Dee gëtt vu “Quartierstuff” géréiert, op Terrain, deen de FUAK zur Verfügung gestalt huet. Déi Äishelleg si Mëtt Mee laanscht, da kann ech elo Gromperen planzen. Ee ganzt Feld, enfin eng Parzell vun 3m2. 100 Deeg méi spéit ass Recolte.

Juni 2020

Während d’Gromperen wuessen, wéinstens Mol d’Geleef iwwert dem Buedem, wuesse keng Pop-up Veloweeër an der Stad. Dat geet net, gëtt gesot. Well et ass eng Festungsstad, wéi d’Buergermeeschtesch spéider beléiert. Festungsstied goufe net fir Veloë gebaut, dat sollt e wëssen. Esou Stied goufen sécherlech fir S.U.V. geplangt, deemols 963. Et ginn der, déi verpasse ni eng Geleeënheet, eng Geleeënheet ze verpassen.

Wat Rassismus a Xenophobie ubelaangt : eng Urban Art Creatioun, net wäit vum foodforthezens, bei der Gantebeensmillen, brengt et op de Punkt.

Juli 2020

Ufank Juli geet eng Zäitfënster op an et eraus an déi wäit Welt, bei meng Meedercher an hir Studentestied. Mam Zuch geet dat fein. Mam Anouk feieren ech säi Gebuertsdag op der Biergartenterrass vun engem Restaurant beim Hofgarten zu München. Mam Cathie feieren ech säin Ofschloss vum Medizinstudium an engem Studentelokal am 12. Bezierk zu Wien. Et si zwou Stied mat ganz vill Konscht a Kultur, bannen a baussen. Wonnerbar.

Een Tëschestopp war zu Konstanz um Bodensee. Do ass manner Konscht, dofir méi Querdenker. Am Fong ass anescht denken, eben net ëmmer nëmme maache wéi se all, jo eppes Guddes. Zum Beispill wir soss jo d’Rad ni erfonnt ginn. Et ass awer eppes Aneschters just ze gleewen well een eben mengt oder eppes héieren huet, oder ze gleewen wat d’Wëssenschaft seet. Wëssenschaft sammelt Fakten, net Meenungen a si analyséiert dann des Fakten.

Een Avantage vu mam Zuch furen ass, dass een dann fein Zäit huet fir ze liesen, zum Beispill esou Bicher wéi “Zieht euch warm an, es wird heiss” vum Sven Plöger. De Meteorolog aus der däitscher Televisioun schreiwt iwwer d’Klimakris. Déi gëtt et och nach ëmmer. Si mécht keng Paus. Dowéinst musse mir der Wëssenschaft nolauschteren. Bei Corona a Klima musse mir parallel denken an handelen fir dat Richtegt ze maachen. Déi zwou Krisen si schwiereg ze kommunizéieren, well se komplex sinn, well et komplex ass. Et ass méi einfach schlicht Behaaptungen an d’Welt ze setzen. Nees doheem ass mäin éischten large scale Test negativ. Dat stëmmt mech positiv.

August 2020

Huch! De Gruef an der Stad gëtt dach tatsächlech, vum 1. August un, fir e puer Wochen, provisoresch, eng Foussgängerzon. Gréng wierkt an awer ass et wéi de Max Weber deemols sot « Politik bedeutet ein starkes, langsames Bohren harter Bretter, mit Leidenschaft und Augenmass zugleich”.

D’Geleefs vun de Gromperenstäck an der Zwergeparzell am Quartier Gréngewald um Kierchbierg wiisst. Rondrëm de Schoettermarjal, bei mir direkt niewendrunn, wiisst och vill Kraut, do wou fréier Heiser stoungen, do wou opgeschott gouf, wéi Heiser, déi elo niewendru stinn an ech wunnen, gebaut si ginn, do wou ni eppes war awer eppes hikomme soll. Eng Zort Biotop ass entstan. Eng Parti Leit haten do eng Protestaktioun gemaach. Et geet em d’Erhale vun der Natur, em do wunne kënnen, em déi zwee zesummen, em dorëmms weem d’Stad gehéiert, em Participatioun, em schwetzt mateneen. Vun Ufank un.

Et wor esou am Summer, stoung alles an der Bléi, du rifft den Zense Polchen, seng Familjen op ee Fest, am foodforthezens zesummen, t’war fir ronn zeng Leit gedeckt. Liewen um Limit!

September 2020

Well dat mat der rue du Fossé als Foussgängerzon, während dem Provisorium, esou gutt fonctionnéiert huet, fanne mir vun de Stater gréng, dass een dat elo soll definitiv maachen.

Ech hun definitiv vill Äppel am foodforthezens a baken meng éischt Äppeltaart. Manner grouss ass d’Récolte bei de Gromperen. Si schmaache fantastesch.

Grad esou genéissen ech déi vill Konschtwierker an der Villa Vauban, dem Mudam, dem Musée um Fëschmaart an déi am Mëllerdall. De Vakanzebong ass agléist. Merci.

D’Basketball Saison geetlass. Mir, vum Basket Racing huelen, wéi all déi verantwortungsvoll a rücksichtsvoll Leit, déi néideg Hygiènesmesuren fir Spiller, Zuschauer a Bénévolen. Sport ass wichteg. Ech Mengen net de Sport als Spektakel, am Stil panem et circenses, mat iwwerbezuelten an iwwerbewerte Sportsherolden. Ech menge virun allem, Sport maachen well et gutt ass fir Härz a Longen, fir déi lokomotoresch Kierperkomponenten, fir Sozialkompetenz, fir Integratioun an Inklusioun, fir ze léieren Regeln an ze halen, och déi aktuel géint de Coronavirus, virun allem awer déi vun zesumme liewen a zesumme wierken.

Fir den GMMP Comptage (Global Media Monitoring Project) hat ech fläisseg mat fichéiert, well et wichteg ass fir serieux Medien, serieux z’informéieren, balancéiert an Inhalt a Form. 

Oktober 2020

Mir vun de Stater gréng, haten ons ugewinnt all Joer eng Rees an d’Ausland ze maachen, fir méi gescheit ze ginn, Inspiratioun ze fannen, Saache ze gesinn, déi et anzwousch anescht gëtt a déi an der Stad och fonctionnéieren missten/kéinten/sollten. Aus pandemesche Grënn si mir hei am Land bliwwen a waren an d’Minettemetropolen Kayl/Téiteng, Esch-un-der-Uelzecht an Déifferdéng. Mir ware mam Velo ënnerwee, am Reen, mat der Sonn am Härz. Ons Gehirer gutt duerchlëft, ware mir ganz rezeptiv fir déi vill gutt Projeeën: Energiekooperativen, Promotioun vu Kreativitéit, Méiglechkeeten an der Logementspolitik, Transitioun. Op onsen Etappen si mir awer och drunn erënnert ginn, dass et méi flott ass, am Schäfferot mat ze décidéieren, wéi just kënne Villes ze proposéieren.

Dat vum gedëlleg deck Brieder buren, hat ech jo schon virdrunn geschriwwen. Entspriechend war mir nees mam Velo bei de Kollegen vun ProVelo fir d’rue du Fossé (dat war fréier wuel de Gruef ausserhalb vun de Festungsmaueren) autofräi ze kréien.

A well d’Beem nach voller Äppel sinn, baken ech weider Taarten an iessen se och.

Well et ouni Konscht net geet, war ech zweemol an d’Philharmonie, zweemol Beethoven, grouss mam OPL a Krystian Zimerman (Pianosconcert’en 4 a 5), a méi kleng mat Frank Peter Zimmermann a Martin Helmchen (Violinsonaten). Op dem Daach vun der Philharmonie si Fotovoltaikmoduler: Sun to power to music. Hei am Land ginn et ronn 146.000 Gebeier vun deenen bal 80 % gëeegent sinn, fir Solarstroum ze produzéieren. Ee Potenzial vun 3.540.000 KiloWattpeak. Dat ass vill.

November 2020

Den 11.11. hat ech mäin éischten Optrëtt als President vun Eurosolar Lëtzebuerg. Mir hun zesummen mat myenergy a Vertrieder vum O.A.I., ee Guide presentéiert, dee weist, wéi ee Fotovoltaik an Architektur flott mateneen kombinéiere kann. Mei doriwwer hei.

Den 11.11. feiere vill Leit den Ufank vun der Fuesend. Vum ville feieren ereechen si dann de Kipppunkt. Dest Joer ass dat awer ausgefall. Net ausgefall ass d’Angscht virun de Kipppunkten an der Coronakris an an der Klimakris. Also de Moment wou d’Saachen ausser Kontroll geroden. Bei der Covid-19 Kris sinn dat virop d’prise en charge vun de Leit déi krank sinn an d’Käschten. Deen zweete Volet bedengt nawell gär d’Capacitéit vum éischten. Bei ons ass dat manner de Fall wéi am Ausland an dat ass och gutt esou. Et soll jo net sinn, dass d’Ekonomisten décdiéieren wat medizinesch indiquéiert ass.

De  Kipppunkt bei der Klimakris ass de Moment wou den zevill vun CO2 an d’Erderwärmung et fir de Mensch schwiereg mécht, fir op der Erd ze wunnne. Och nom Kippen, dréint d’Erdkugel weider hir Ellipsen rondrëm d’Sonn, iwwertdeems d’Fro déi sech stellt, ass déi vun de Menschen hirer Resilienz. Wivill hält de Mensch aus?

Wivill Videokonferenzen hält de Mensch aus?

Den traditionnellen Salon vum C.A.L. am Tramsschapp huet och dest Joer ee flotten Iwwerbléck iwwer Konscht zu Lëtzebuerg.

Dezember 2020

Am Dezember ass eng Zort Endzäit Atmosphere an der Loft. Entweder well jiddereen iergendwéi frou ass, wann d’Joer 2020 eriwwer ass. Vläicht ass et och well mir wëssen, dass mir an een down gelocked ginn. Fir mech schwéier ze verstoen. Net Noutwendegkeet vun strenge pandemeschen Mesuren, mee, merde alors : wat ass net ze verstoen bei de gestes barrières ? Si si keng rocket science ! Oder et ass d’Angescht virum Coronakipppunkt.

Gutt Nouvellen, toute proportion gardée, gëtt et am Handelen géint de Klimakipppunkt : den Tram fiirt elo vum nordöstleche Stater midfield, dem Kierchbierg, queesch duerch d’Festungsstad, op der aner Säit nees eraus, quasi bis an déi fréier Gemeng Hollerech, also op d’Stater Gare. Ee Puzzlesteck fir eng aner Mobilitéit, manner CO2 lasteg, méi zilorientéiert a pragmatesch wéi déi bis elo pathetesch statussymbolesch.

D’rue du Fossé ass entretemps, um Pobeier, an eng zone de rencontre ëmgewandelt ginn. Elo nach ee klengen architektonesch-urbanisteschen Effort a si ass et och visuell.

De François Benoy weisst mat senger Budgetsried-analyse an der Chamber, dass hien och ee Top Finanzminister ka ginn.

Ech ginn dogéint bei de Coiffeur, nach huerteg eng läschte Kéier virun de Feierdeeg an dem lockdown (bei mir falen awer keng Locken méi down).

D’Feierdeeg ginn besënnlech, gemittlech, friddlech. Ech verbrenge se am foodforthezens zu Poliarritz.

Januar 2021

Et ass elo alles nach nei an awer och gewinnt. Dat ass gutt esou, well de Mensch brauch jo seng Komfortzone. Mir Mënschen si nawell Gewunnechtsdéieren. Déi gutt Noriicht deemno: mir kënne ons Gewunnechten, déi mir déi läscht Wochen a Méint léif gewonnen hunn, och nach eng Zäit bäibehalen: Mask un, 2 Meter Ofstand, Patte wäschen. Net komplizéiert awer recommandéiert, well soss komme mir ni eraus aus deem „no vir a nees zreck“. Da gëtt geimpft géint Covid-19. De Vaccin géint d’Klimakris gëtt et och: d’Fotovoltaïk. Dee géint den Onverstand ass d’Wëssen.

Dat geschriwwen: alles Guddes, Léiwes a Lëschteges 2021. Alles gëtt gutt.

*“Mit den Haien streiten”, CID Fraen an Gender, capybarabooks, ISBN 978-99959-43-16-5, 2018.

** “Zieht euch warm an, es wird heiss”, Sven Plöger, Westend , ISBN 978-3-86489-286-8, 2020

Kategorien
stadlëtzebuerg zesummenhalt zukunft

Corona geet ons all un

Um Knuedler an der Stad, stoung haut d’Coronakris am Mëttelpunkt. Et geet drëms ze hëllefen an zesummen a solidaresch sech géigesäiteg z’ënnerstëtzen. Dofir hun d’Vertrieder vun déi gréng am Stater Gemengerot eng ganz Rei Virschléei gemaach a Froë gestallt, dat goung vun besonneschen Hëllefen fir déi Leit, déi et souwisou scho schwéier hun bis zu temporaire Velosweeër. A well „la meilleure pédagogie se fait par la répétition“, ass och eng Informationsbrochure a verschiddene Sproochen an all Bréifkëscht an der Stad, eng gutt Saach. Och sollt de Stater Geschäftsleit gehollef ginn. Dat a nach vill méi hei

Kategorien
gutt liewen integratitiv Kreativitéit Partizipatioun Sport stadlëtzebuerg zesummenhalt

Vill léiwer de Pafendall wéi Moskau

Kaum ass dat eent Futtballturnéier eriwwer, dat zu Moskau, da kënnt dat next, dat fir mech méi flott, dat op enger Plaz wou ee sech méi wuelt fillt, a Plaz do, wou dëslescht Frankräich gewonnen huet, nämlech am Pafendall: déi 58. Coupe Gaston Diderich an 43. Coupe Roger Diderich vum Red Black Egalité 07 Pfaffenthal Weimerskirch. Elo an der Woch d’Qualiën an e Sonndeg d‘Finallen vun 15H00 un am Stade Gaston Diderich, 100, rue Laurent Ménager, Lëtzebuerg-Pafendall.

IMG_2595

Hei d’Virwuert, dat ech als Vizepresident vum Organisatiounskomité an d’Eventbrochure, eng groussarteg Brochure, geschriwwen hun:

Vorwort Coupe GDiderich

Dat ass kompakt wourop et ukënnt a firwat ech zënter Joren am Sport engagéiert sinn.

Beim Futtball ass et och wéi am Liewen: mat der perfekter Kombinatioun vun Talent, Intelligenz, Fläiss an Duerchhalen setzt ee séng Chancen erop séng Ziler z’ereechen. Kombinatioun heescht an dësem Fall mateneen an et heescht séng Begabung an den Déngscht vun der gudder Saach ze stellen, fir se am richtegen Ablack an ze setzen. Méi schwéier ass et net. Awer och net méi einfach.

D’Basis fir zum Beispill un engem Futtballturnéier mat ze spillen, op am Pafendall oder zu Moskau, gëtt an de Clibb geluecht. Si sinn déi éischt Ulafplaz fir d’Kanner. D’Bénévole sinn déi éischt Uspriechpartner, Animateuren, Betreier,…. Dowéinst solle si, egal op aus dem  Breedensport awer och am Spëtzesport, besser ënnerstëtzt ginn. Fir eng gelongen Integratioun an Inklusioun.

Ee vun de Projeeën an Ziler vum Sport ass sech ze vergläichen a méiglechst gutt dobäi ofzeschneiden. Dat gëllt grad esou fir d’Théikenéequipe wéi fir den ambitionnéierte Feierowendsportler an fir de potentiellen internationale Champion. A fir des Lescht genannt ass et onbedéngt néideg, déi richteg Mëttel zur Verfügung ze stellen. Och do gëllt, wéi an der Kultur, wou dëser Deeg Ee gesot huet, dass d’Budgetsmëttel déi do engagéiert ginn, net als Dépense, mee als Investissement missten ugesi ginn. Jidereen ass dann houfreg op deen aus eiser Mëtt, uewen um Podium. Och wann dee séng Medail dann méiglecherweis vun engem Voyou iwwreecht kritt a oppassen muss mat wiem hien sech fotograféieren léisst.

A nach ëmmer bleiwt et richteg, dass Sport, ouni biochemescht Gefuddels, gesond ass. Fir Kierper a Geescht. Am Lycée krut ech deemols ee Sticker mat „3 Stonnen Sport an der Schoul“ drop geschriwwen. Ech si mir net sécher, dass, wat de Stellewert vum Sport e.a. an der Schoul ubelaangt, et zënter deemols besser ginn ass. Dat wir awer néideg well mir eis Gesondheet (kierperlech a geeschteg), eis Kanner, eis All, eis Compétitivitéit, eist Land gär hunn. Loosst et ons geschéihen doën!

Den FC Red-Black Egalité 07 Pafendall-Weimerskierch spillt en Sonndeg déi grouss Final um 17H00. Um 15H00 ass de Match fir déi 3. a 4. Plaz. E Freideg spillen den RM Hamm Benfica géint den F.C. Avenir Beggen.
IMG_2598
Kategorien
grengwierkt Mobilitéit stadlëtzebuerg

Kamoud douce Mobilitéit

Ennert der Iwwerschrëft „Watfir ee Wee fir de Velo“ hate mir vun déi gréng aus der Stad d’Press an d’Theaterstuff invitéiert direekt niewend de Chantier vum Tram. Eng Plaz mat engem grousse Potenzial fir gutt Mobilitéit. Als President vun der Lokalsectioun hat ech Haut eng kuerz Introductioun gemaach. Voilà:

Fir ons gréng ass gutt Mobilitéit douce. Si schount d’Natur, ass gutt fir d’Emwelt deemno och gutt fir ons all.

Gutt Mobilitéit ass Mobilitéit déi komfortabel ass, déi passt. Déi kamoud ass. Gutt Mobilitéit ass déi déi engem erlaabt méi Zäit ze hu fir dat ze maachen, wat ee gär mécht, wou ee gär ass a mat wiem ee gär ass. Doheem, bei der Famill, op der Schaff, mat Kollegen. Deemno proposéiert gutt Mobilitéit Optiounen. Alternativen, déi eben Kamoud sinn. Et geet net géint den Auto, mee fir esou vill Auto wéi néideg, esou vill Velo wéi méiglech.

Mobilitéit fänkt am Kapp un fir dann konkret ëmgesat ze ginn. Als éischt muss een mat eppes ganz Essentiellem ophalen, nämlech ze denken, dass just Säint  gëllt. Et geet net géint den Auto, mee em esou vill Auto wéi néideg, esou vill Velo wéi méiglech. Maximal Flexibilitéit, Confort, Qualitéit sinn Essentials fir gutt Mobilitéit.

An der Schefferotserklärung gouf geschriwwen, dass op der enger Säit, vill an de leschte Joren an d’Promotioun vun der doucer Mobilitéit investéiert gouf an dass dat och esou soll weider goen. Et steet e.a. geschriwwen vun der Bréck vum Weimeschaff via Neiduerf op den Cents. Et gëtt an der Schäfferotserklärung och op d’Orientatiounshëllef vun der Tramsstreck fir nei Velosweeër higewisen. Esou richteg nei ass do näischt. Laut Schefferotserklärung géng eng approfondéiert Etude lancéiert ginn iwwer kiirztméiglechs Velosweeër tëschend de Quartierën. Fir ze kucken op dat méiglech ass oder och vläicht firwat et net geet. Gréng dogéint wir fir ze kucken dass et geet.

Nët gefeelt huet an der Schefferotserklärung d’Feststellung, dass den Auto eben zu de Gewunnechte vun de Leit gehéiert. Nawell fatalistesch. Am Genre: et kéint een eben näischt maachen. Wéi wann et keng Alternativen géng ginn. Alternativen notamment de Velo si keen Thema. Dat gëtt ons een ongutt Gefill. Dat ongutt Gefill gëtt verstärkt, well déi Schefferotserklärung schon sechs Méint hir ass. No sechs Méint gëtt et näischt Neies.

Alternativen notamment de Velo si keen Thema. D’Alternativen mussen esou attraktiv sinn, dass een motivéiert ass fir al Gewunnechten z’änneren. Dowéinst ass elo dee richtegen Moment fir een drëtt Veloskonzept hei an der Stad ze maachen. Mir haten der bis elo zwee. Elo kënnt den Tram an de Stadzentrum. Dat gëtt nei Méiglechkeete fir méi eng kamoud Mobilitéit.

No den allgemengen Erklärungen vum Schefferot gëtt et onser Meenung no Zäit fir méi Substantielles a Konkretes. Well si net liwweren, liwweren mir: hei esou wéi mir déi gréng aus der Stad et gesinn. D’Sam Tanson an de François Benoy hun dat alles nach méi détailléiert top erklärt.

Kategorien
Demokratie grengwierkt Kreativitéit Partizipatioun stadlëtzebuerg

Sech këmmeren em dat Grousst a Ganzt a Klengt a Ganzt.

Dëser Deeg huet de President gegrinst. Trotz der Konkurrenz vum Futtball, den FC Bayern huet géint de Real gespillt, war de Sall voll. Den Interessenveräin vum Kierchbierg hat op séng Generalversammelung invitéiert. Dat war Mëttwochs. Freides war et um Interessenveräin aus dem Pafendall. Och do waren vill Leit.

De Comité vum Pafendaller Interesseveräin ; ordre du jour a.g. Kierchbierg

Déi zwee Comiteeën vun deenen zwee syndicats d’intérêts locaux vu Stater Quartierën haten vill geschafft déi läscht 12 Méint. Si haten den Autoritéiten  vun de verschiddensten Niveauën Bréiwer geschriwwen. Mat verschiddenen hu si sech getraff. Mat aneren hätte si sech gären getraff. Et goung ëm Bussarrêten, em Foussgängersträifen. Si hun intervenéiert wéinst ze héicher Vitesse, virun allem an de 30er Zonen, och all ze dacks vun deen Awunner aus eben deenen Zonen. Ganz rücksichtsvoll ass dat net vis-à-vis vun de Noper. Iwwerhat ass vill Verkéier, vill méi Verkéier wéi fréier. Et gëtt och méi Wunnengen wéi fréier. Méi Awunner a méi Leit déi op déi vill Aarbechtsplazen schaffe kommen.

Den Interessenveräin vum Kierchbierg ass zënter e puer Joer vill mat engem groussen Wunnengsprojet um Schoettermarial beschäftegt. Do hätt scho laang kéinten gebaut ginn. Gouf et awer nët. Wéi dee neie Bauprojet virun e puer Joër opgetaucht ass, hun sech ganz vill Leit aus dem Quartier ganz vill Froen gestallt. Do sollten iwwer 400 Wunnengen hi kommen. Wunnengen déi gebraucht ginn. Wat awer och heescht, dass d’Awunnerzuel do soll quasi verduebelt ginn.

Do kéint scho laang Yet stoen, mee et gouf sech ganz vill Zäit gelooss a wuel spekuléiert. De private Propriétaire hat et verjuppt. Hat hien keng Suen, kee Plang, keng Loscht, hat hien spéculéiert, sech verspékuléiert? Mir wëssen et nët. An dunn huet d’Natur hir Rechter zréck geholl. Mam Retour vun der Natur ass nees eng aner Welt entstanen, eng Welt déi duerch d’Naturschutzgesetzer, och Rechter huet. Entretemps ass do ee Biotop entstan mat vill Gedéiesch, Gréngs a Fliedermeis.

Fotoausstellung Pafendall 1970; Kaart Kierchbierg zirka 1950

Déi Responsabel vun der Gemeng hun bei den éischten Reklamatiounen nom Retour vum Projet, de Leit nogelauschtert, hu mat deem aner Propriétaire, ee groussen Deel vum Terrain gehéiert der Stad-Lëtzebuerg, verhandelt, getosch, ee méi klenge Projet ausgeschafft. Et géng alles gutt. Mee, misstrauësch, huet de Syndicat weider démarchéiert. Mat klengem Erfolleg awer et ass jo nach net färdeg.

Et geet nach ëmmer ëm dee villen Autosverkéier, ëm Buedemversigelung, ëm rare Speziën. E bëssen not in my backard war bei Eenzelnen och dobäi, grad awer och wéi d’Asiicht, das Wunnengen gebraucht ginn. Et ass virun allem d’Ongewëssheet: wéi soll dat fonctionnéieren ? Vill méi Leit, vill méi Traffic. Uewen um Kierchbierg.

Ënnen am Pafendall geet et och em de villen Traffic duerch déi vill nei Schaffplazen an Awunner virun allemn uewen um Bierg. Och wann do duerch eng Parti nei Infrastrukturen, e.a. de Funiculaire an de Lift fir an de Pafendall, schon vill verbessert gouf et bleift och do d’Fro: wéi soll dat goen?

Et stoung an der Zeitung: 45.000 Awunner a 60.000 Aarbechtsplazen sollen op de Kierchbierg kommen. Dat bedeit niewend dem Traffic an de ville Leit och nach vill Beton a Makadamm. Wéinst dem Uewerflächewaasser heescht et elo schon wann et vill reent „Land unter“ op der Muerbels am Pafendall. Et gëtt sech entspriechend Gedanken gemaach, wéi dat goen soll mat deem Wuesstum.

Wuesstum. Een Iwwel deen ee muss a Kaf huelen fir de Liewensstandard. Dat klengt wéi eng Fatalitéit déi iwwer een erabrecht. Eng Plo géint déi ee sech net ka wiren.

Mee dat ass net esou. Wuesstum kann ee steieren a plangen, wann ee wëll. An dann heescht et nët méi Wuesstum, mee mir wuessen well mir et wëllen, wéi mir wëllen. Dat ass net ze verwiesselen mat Planwirtschaft, mee et huet trotzdeem mat plangen ze dinn. Domat sech als Gesellschaft Critèren ginn, Leitplanken setzen, fir ze wuessen, fir dass deenen Eenzelenen hir verschidden Dynamiken a Créativitéit a soss Stärkten beschtméiglechst zum Droen kommen.

Esou handelen ass ongewinnt wann ee jorzéngtelaang gewinnt war Gottes Waaser iwwer d’Marienland lafen ze loosse. Ouni Plang, no de Regelen vun de stärksten Eelebéi an dem längsten Aarm. Nët onbedéngt am Intérêt vun der Allgemengheet.  De Leit all. Ons all a net just fir „the chosen few“. Et gëtt scho laang iwwer noutwendeg Korrekturen geschwat awer et ass näischt gemaach ginn.

Elo ass et anescht. Et gëtt Geschéck gemaach. Et gëtt vun de Politiker déi dofir zoustänneg sinn net méi vum lénksen an de rietsen Tirang getesselt. Et gëtt décidéiert a Geschéck gemaach. Virun der Décisioun ginn d’Leit mat abezunn a konkret bedeelegt. De participativen Discours ass deen eenzegen deen an der Demokratie fonctionnéiert. D’participativ Praxis mécht, dass d’Demokratie fonctionnéiert.

Dofir ass et wichteg, dass et Leit ginn déi sech këmmeren ëm dat Grousst a Ganzt a Klengt a Ganzt.

Kategorien
Demokratie enmarchelaanschtdeknuedler grengwierkt stadlëtzebuerg

Countdown -0 = Waldag

Ah zut! Scho nees net Buergermeeschter (mee éierlech, ech hat och net domat gerechent). Als 12. vun onser Lëscht wer och wäit ewäch vum Gemengerot (7. Ersatz) well mir hun 5. Sëtz kritt, esou vill wéi 2011. Den Détail hei

Mäin eenzel Resultat ass besser wéi 2011.
2017: 4.114 Stëmmen dovun 3.023 Lëschtestëmmen an 1.091 Eenzelstëmmen
2011: 3.256 Stëmmen dovun 2.535 Lëschtestëmmen an 721 Eenzelstëmmen

67 aner Kandidaten kruten méi Eenzelstëmmen: 5 vun der LSAP, 22 vun der CSV, 24 vun der DP, 11 grénger, 3 vun déi Lénk an och 1 an nach 1. Wat dës zwee ugeet: et ass fir sech ze schummen. Am ganzen sinn ech den 68. ginn vun 208 (2011 war ech den 80.). All d’Kandidaten vun der DP an der CSV kruten méi Stëmmen. An och zwee vun der LSAP an 11 grénger. Am Männerranking sinn ech den 4 vun déi gréng an den 33. vun 123 Kandidaten.

Sinn ech frou doriwwer? Nö! Ech freeën mech awer elo op e puer fräi Deeg, ouni papen, ouni Flyer verdeelen, ouni racolléieren.

D’urban Legend, dass wann een ee Numm huet dee ongënschteg am ABC läit, wéi zum Beispill een, dee mat engem „Z“ ugeet an een op läschter Plaz op der Lëscht ass, ass eben just eng Legend. Bei der CSV an DP hunn déi, déi als läscht op dem Walbulletin stoungen, beser ofgeschnidden, stëmmenméisseg an am Ranking. Si goufen direkt gewielt. Dee vun der LSAP war wéi ech, den 12. op sénger Lëscht, hat awer manner Stëmmen. All déi aner waren hannert mir. Just een ass wirklech de läschten bliwwen, ABC an Stëmmenméisseg.

Egal, mir hun als Partei, trotz der zum groussen Deel erneierter Lëscht, bäi gewonnen, vun 18,45 % op 19,26 %. Dat ass super!

An awer ass et traureg, well, ouni, dass mir désavouéiert gi sinn, am Géigenddeeel, mir an der Oppositioun lande können/werten. Dat ass de Wielerwëllen.

A jiddereen ass oppe fir Gespréicher.

 

 

Kategorien
Demokratie enmarcheopdeknuedler grengwierkt integratitiv Kreativitéit Partizipatioun stadlëtzebuerg

Countdown -1 (07-10-2017)

Ech erlabe mir drop opmierksam ze maachen, das Reihenfolg um Walbulletin, ausser denn zwou éischten Positiounen bei ons, déi gréng, Lëscht 1, alphabetesch ass. Sollt zum Beispill e mam „Z“ total vill Stëmmen kréien, dann ass dat voll korrekt a sënnvoll.

All déi aner Regelen sinn bei Wahlbureau affichéiert a stinn op der Convocatioun.

Ween dee mam „Z“ ass, ass gutt ze wëssen, schlisslech geet dorëmms deen/déi ze bestëmmen ween „the most wise and good“ ass fir fir the „common good of society“ ze schaffen.

Joergang 1965, 2 Meedercher, 1,83 m, 82 kg.

Wunnen zu Lëtzebuerg , an der Stadt Lëtzebuerg um Kirchberg-Schoettermarjal.

Politesch bei déi gréng zënter 1995

Member C.E.X. (Comité exécutif) zënter 2011
Member Gender Rot, zënter 2017
Sekretär von der Lokalsektion déi gréng Stad Lëtzebuerg, zënter 2012
Commissions consultatives Ville de Luxembourg:

Action sociale, santé et 3e âge (vice-président)
Enfance
Sports et loisirs
Formatioun:

Infirmier gradué social
Assistant d’hygiène sociale (EIULB Ecole des Infirmiers annexé à l’ULB)
spécialiste en sciences humaines
Master Européen en Management des Organisations sportives (MEMOS IV)
Schaff:

Zënter 1995: Parquet Général S.C.A.S. (Service Central d’Assistance Sociale)
1991 – 1995: Croix-Rouge Luxembourgeoise & Ligue d’Action médico-sociale
Bénévolater:

Zënter 2011: President US Basket Racing Luxembourg
1995 – 2015: Coordinateur sportif C.A. Celtic Diekirch
2009 – 2013: Secretary European Athletics working group for club affairs
2003 – 2009. Secretary European Champions Clubs Cup Juniors
1995 – 2002: Secrétaire général Fédération Luxembourgeoise d’Athlétisme (F.L.A.)
1982 – 1991: Président Club des Jeunes Ermsdorf

HëftgoldMondzou-2
An eng Partei goen, ass e bëssen eng aner Décisioun wéi Member a soss engem Veräin ze ginn. Et ass anescht well een sech fest leet. Et „out“ ee sech wat séng Vue op d’Welt ugeet. Fussball spillen oder Saxophone ass eng Saach, ee gréngen sinn ass eng aner. An enger Partei engagéiert ze sinn ass net rondrëm Gespills, näischt Theoretesches, keng intellektuel Masturbatioun, keen Exercice, mee matschaffen fir d’Réalitéit ze beaflosse, ze changéieren. Et ass den Engagement fir iwwer séng eegen kleng Welt eraus ze denken. Politik gëtt souwisou gemaach. Permanent, iwwerall décidéiert een iwwer mäin Liewen. Falsch Politiken beaflossen mäi Liewen. Zut! Da wëll ech mat schwetzen. Awer net just géint eppes sinn, mee fir eppes. Drunn matwerkelen fir dass et wirkt. Geschéck maachen.

Ech si bio vu kleng un. Déi eng Grousselteren haten ee Gaart um Lampertsbierg (an der Géigend vun der Poubelle vun der Foto), déi aner um Verluerkascht, dono zu Merel.

Meng Elteren haten och ee Gaard an ee Kompostkoup. Mäi Papp huet Béier sacrifiéiert fir d’Schléken vun der Zalot ewäch ze lakkelen a Plaz Gëft ze sprutzen. Mir hun d’Onkraut erausgepickt a Plaz Gëft ze sprutzen an d’Wiss mat der Séissel geméint a Plaz mat der sténkeger Méimaschinn. Mir konnte bei ons am Duerf kee Waaser vum Krunn drenken well zevill Nitrat dran war (Haut och nach). Mäi Papp war mat dobäi wéi de Mouvement écologique gegrënnt ginn ass déi gréng Partei, mäi Brudder huet sech fir bedreete Völker agesat a war soss alternativ engagéiert, et cetera. Mir sinn och geléiert ginn mat ze schwetzen an awer z’iwwerleeën ir mir de Bak opdinn. Och sech net selwer Leed ze doen, mee eppes z’ënnerhuelen, kruten mir mat op de Wee. Dat war bei ons normal. Esou hun ech mech gekëmmert an engagéiert.

Ech sinn eréicht 1995 Member vun déi gréng ginn wéi sech déi zwou deemoleg gréng Parteiën zesummen gedoen hun, well dunn enfin agesi gouf, dass fir Politik ze maachen, een déi eegen Idee, Iwwerzeegung a Meenung net verabsolutéieren därf. Si gehéiert zum demokrateschen Prozess, grad wéi der Meenung vun deenen aneren. Mat manner puritaneschem Ideologismus goufen déi gréng menger würdeg.

Mat der Kultur ass et wéi mam gréng sinn bei mir: Kultur war schon immer do bei ons doheem a rondrëm: ee Pinselen hei, Faarwen do, Musikplakken (=Vinyldisken), Instrumenter, Bastelkrom, Biller un der Mauer, Bicher am Regal, Danzbuedem am Living, Gesang, Duerftheater, Bühnendekor, Solschlësselcher, Xylophone a Blockflûte, Kierchechouer, Uergel, Pantomime, Schoultheater, Molconcour,….. All déi Impulser intriguéieren an interesséieren mech, zënter deemols bis haut. Ass esou.

Sport maachen ech vu jonck un. A gär.

Wéi vill Bouwen hun ech Futtball gespillt, net begaabt awer engagéiert.

An der Liichtathletik hat each eng besser Uluecht. Ech si 400 m geditzt (eng Ronn esou séier wéi méiglech rondrëm d’Pist). Dat war net ze komplizéiert zB mam Ronnen zielen; eng Onz Talent kann een mat Éiergäiz a Fläiss optimiséieren. Deemno hun ech gutt mat gehal, war e puer Champion an hat e puer Staffellandesrekorder. D’Resultater mat de Staffelen waren déi flottst well 4 Leefer hir Egoën an individuell Qualitéiten zesummegetesselt hun fir ee gemeinsamen Projet. Gedeelten Freed ass déi schéinsten Freed.

Dono goufe ech Sportsbénévole. Beim Liichtathletikverband, an mengem Liichtathletikclub, dem Celtic Dikkrich, bei European Athletics an elo als President beim Basket Racing Luxembourg. Duerch all dës Engagementer sinn ech méi gescheit ginn, duerch meng eegen Approximativitéiten awer virun allem duerch de „listen and learn“ mat de villen Leit mat deenen ech do ze dinn hat, hun an nach kréien wert. Elauter absolut Beräicherungen.

Deen eenzegen Discours, deen an enger Demokratie fonktionnéiert an dee mécht, dass Demokratie fonktionnéiert, ass de partizipativen Discours.

IMG_7247

Et soll een deelhuelen. Dat huet mat Kreativitéit ze dinn, mat Freed, mat Dreem a Chancen a Perspektiven, an och mat Tomaten, déi enges Dags dann dee Präis kaschten, deen se wirklech wert sinn ….. a mat dësem Blog.

Ofschloss Aarbecht vu MEMOS & Buch iwwer d’Gemengewahlen 2011

Soss waren et een üblechen Dag fir all Enn vun enger Wahlcampagne: um 7.30 um Maart, dono op der Broschtkribslaf. Dunn nees zréck op der Maart (ongeduscht awer mat anere Kleeder). Am Nomëtteg si mir an der Stater Park gaang fir onst üblecht Gesschir ze verdeelen. Ze bemierken, dass mir all ons Flyer verdeelt hun awer nach Wandmillen a Bikker hun. Eng fréier Buergermeeschtesch a Ausseministerin ass laanscht komm an huet gemengt mir sollte besser Cognac verdeelen. Vläicht net falsch.

Ech sinn elo grand zreck vun onsem Campagne Ofschloss Iessen an der Casa Fabiana. Ech wënschen Iech eng rouëg Nuecht an ee schéine Sonndeg.

Lëscht 1

IMG_9112

*Fotoën: Frank Wiltzius – Portrait 1: John Gerard – aner Fotoen: Familijenalbum.

Kategorien
Demokratie enmarcheopdeknuedler integratitiv Partizipatioun stadlëtzebuerg

Et war net Een…Aleng

Dëser Deeg, enfin dëser Wochen, Enn Juli, sinn zu Bouneweeg an an der Péitruss Spill- a Fitnessplazen fir jhiddereen ageweit ginn. Bei den zwou Aweiungen waren ganz vill Leit do, net just Politiker fir op d’Foto, mee eben och déi fir déi d’Anlagen sinn.

Kaltreis Spillplaz 1 - copie

Et sinn do Geräter an Installatiounen fir all Alter an all ludesch Fräizäitgestaltungsobjektiver : vun pädagogesch wertvolle Spiller iwwer Muskelopbau bis Stressofbau. Alles ! An an Topqualitéit ! Zu Bouneweg um Kaltreis ass et eng Installatioun op 5 ha, mat 15 hightech Poubellen, Basketskierf, Biowiss, Muppewiss, Weiher, Sandkaul, Klammrakéit, Rutschbahn, Lafwee, Zen-Eck. Et war no 20 Joer déck Zäit fir eng Rénovatioun.

Capture d_écran 2017-07-22 à 10.16.50

Ir de Park um Kaltreis den 21. Juli 2017 ageweit ginn ass, ass se gebaut nom Projet an Devis, deen den 11. Juli 2016 am Gemengerot gestëmmt ginn war, LSAP an ADR hu sech enthalen, all déi aner waren dofir. Fir déi gréng huet de François Benoy dem Schäfferot félicitéiert, dass en ëmmer méi op de Wee vun der Biergerbedeelegung geet. Well, do virdrunn waren d’Awunner aus dem Quartier opgeruff ginn fir beim neien Entworf mat ze maachen. Et gouf dofir zwou Versammelungen mat all den interesséierten Leit. Dono gouf Gescheck gemaach.

D’Resultat ka sech weisen loossen. Fir d’Viviane Loschetter, Schäffin vun déi gréng, ass et logesch, dass d’Leit, déi esou eng Anlag benotzen, och gefrot ginn wat hinne gefällt, wat net, wat besser ka gemaach ginn. D’Dynamik an d’Motivatioun vun de Bierger aus dem Quartier war grouss.

Spillplaz Péitruss 20Juli2017 - copie

Den Dag virdrunn war eng aner Parkanlag an der Péitruss offiziel op gemaach ginn. Déi ass no deselwechter partizipativer Manéier geplangt a gebaut ginn. Manner grouss, méi kompakt, Muppewiss inclus. Och do eng Plaz, een Treffen vun alle Kulturen, Nationalitéiten, Sprochen, fir all Alter, fir an d’Gespréich ze kommen, sech kenne ze léieren. Partizipativ an integrativ. Fireneen, mateneen. Esou soll sinn.

Bon, Spillplazen, et ginn der 200 um Stater Territoire, zesummen aménagéieren ass op den éischten Bléck ee banalen Exercise bei deem Keen eppes ze verléieren huet. Et ass awer och eng Zort blueprint oder Training fir d’Partzipatioun a méi groussen Dimensiounen.

Dat ass an der läschter Gemengelegislatur an der Stad och scho geschidd an ass am gaang, zum Beispill fir den Neiaménagement vu Plazen matzen am Quartier, zu Bouneweg, Hamm, Belair, Lampertsbierg, am Garer Quartier…. an dat wert mat de Gréngen och weider geschéien. Och doriwwer eraus: wann nei Quartieren oder méi grouss PAP geplangt ginn, sollen och d’Awunner aus de Nopeschquartieren matagebonnen ginn.

Versammelung LampertsbiergMat de Leit schwätzen, hinnen nolauschteren, Ried an Antwort stoen.

D’Syndikater aus de Quartieren gi weider ënnerstëtzt an do wou keng sinn, sollten esou Comiteeën gegrënnt ginn. Dat includéiert och finanzielle Support. Iwwerhat Suen a Budget.: bis elo ass d’Partizipatioun an de Quartieren just bei konkreten Projeten gemaach ginn. Quartiersbudgeten sinn eng aner Optioun déi onbedengt agefouert soll ginn. Een Obulus fir Initiativen an Ideeën iwwer déi d’Quartierscomiteeën oder Syndiken mat décidéieren. Dat mat der Hëllef vum Quartierskoordinateur/koordinatrice, deen sech ëm d‘Servicer vun der Stad am Quartier, d’Zesummenliewen an d’Participatioun këmmert.

Initiativen an Ideeën sinn dat eent, da Geschéck maachen dat anert. Och dat geet am beschten zesummen: d’Bewunner aus dem Quartier, de know-how vun de Servicer vun der Gemeng an och déi Gewielten, déi responsable décidéieren, dofir si se jo do. Dat ass een vläicht ongewinnten Exercice a verlaangt eng aner Manéier fir ze denken, vun alle Säiten.

Dat soll et jidderengem wert sinn, well deen eenzegen Discours, deen an enger Demokratie fonctionnéiert an dee mecht dass d’Demokratie fonctionnéiert, ass de partzipativen Discours. Da wierkt et.

Foto 1 uewen: paulzens.net – Foto 2 an Foto 3: screenshot fb – Foto 4: paulzens.net